4 jeltoqsannan bastap enpf-otbasy.kz platformasy arqyly oftalmologıalyq qyzmetterdi birjolǵy zeınetaqy tólemderi (BZT) esebinen tóleýge ótinim qabyldaý toqtatylady, dep habarlaıdy aqshamnews.kz
Bank málimetinshe, atalǵan kúnge deıin berilgen barlyq ótinimder qabyldanyp, qoldanystaǵy tártipke saı qaralady.
- Oftalmologıalyq qyzmetter boıynsha ótinim qabyldaýdyń toqtatylýy Densaýlyq saqtaý mınıstrliginiń birjolǵy zeınetaqy tólemderin emdelýge paıdalaný qaǵıdalaryna engizgen ózgeristerimen baılanysty. 2025 jylǵy 3 jeltoqsanda jarıalanǵan buıryqqa sáıkes, stomatologıamen qatar oftalmologıa da zeınetaqy qarajatyn paıdalanýǵa bolatyn baǵyttar tiziminen alynyp tastaldy, dep habarlady qarjy uıymy.
Otbasy bankiniń dereginshe, qazir «oftalmologıa» baǵyty boıynsha jalpy somasy 13,3 mlrd teńgeni quraıtyn 15 808 ótinim qaralyp jatyr.
Onyń ishinde 4,6 mlrd teńgege teń 5 myńnan astam ótinim boıynsha qujattardy tekserý júrip jatyr, al 10 677 ótinim (8,7 mlrd teńge) ıelerinen qosymsha dáleldeıtin qujattar suralǵan.
- Stomatologıalyq qyzmetter boıynsha ótinim qabyldaý toqtaǵannan keıin oftalmologıaǵa júginýshiler kúrt kóbeıdi. Eger 15 qyrkúıekke deıin aıyna orta eseppen 174 ótinim maquldansa, shekteý engizilgennen keıin bul kórsetkish aıyna 1 264 maquldanǵan ótinimge deıin ósti — ósim 7 eseden asady, dedi bank.
Bank mamandary birneshe kúmándi jaǵdaıdy anyqtaǵandaryn da atap ótti.
- Ártúrli klıentterden bir oftalmologıalyq klınıkamen kelisimshart jasalǵan ótinimder túsken. Alaıda qujattarda klınıkanyń ár qalada ártúrli mekenjaıy kórsetilgen. Tekserý barysynda ol mekenjaılarda mundaı klınıka joq ekeni belgili boldy, dep málimdedi uıym.
Sonymen qatar bank ókilderi qazaqstandyqtar úshin zeınetaqy jınaǵyn ómirlik mańyzy bar qymbat emderge paıdalaný múmkindigi áli de bar ekenin aıtty.