Qazaqstannyń joǵary oqu oryndarynda jasandy ıntellekt baǵytyndaǵy jobalar sany artyp keledí, – dep habarlaıdy aqshamnews.kz tílshísí.
Baǵdarlamanyń alǵashqy kezeńínde studentterdíń jasandy ıntellekt salasyndaǵy bílímín arttyruǵa basymdyq berílse, búgínde olar naqty máselelerdí sheshuge arnalǵan óz jobalaryn jasap jatyr. Qazírgí tańda jobaǵa elímízdegí 105 joǵary oqu ornynan 87 myńnan astam student pen 1 500-den astam oqytushy qatysuda.
Eń kóp joba bílím beru salasynda ázírlengen. Búgínde oqu úderísín jeńíldetuge, oqytudyń sapasyn arttyruǵa jáne ákímshílík jūmysty avtomattandyruǵa baǵyttalǵan 188 joba íske qosylǵan. Būl joǵary oqu oryndarynyń tek maman dayarlaıtyn emes, jańa tehnologıyalardy ázírleıtín ortalyqqa aınalyp kele jatqanyn kórsetedí.
Jobalardyń bírqatary qazírdíń ózínde tájírıbede qoldanylyp jatyr. Sonyń bírí – Ūlttyq testíleu ortalyǵy íske qosqan AI-Talapker chat-boty. Ol talapkerlerge ŪBT men joǵary oqu oryndaryna túsu máselelerí boıynsha keńes beredí. Búgínge deıín júıe 69 myńnan astam ótíníshke jauap bergen.
Al Satbayev University ázírlegen jasandy ıntellektíge negízdelgen onlaın baqylau júıesí emtıhannyń ashyq árí ádíl ótuíne kómektesedí. Būl júıení búgínde sheteldík ūıymdar da paıdalanyp otyr. Paıdalanushylar sany 180 myńnan asty.
Sonymen qatar AlmaU unıversıtetínde tapsyrmalardy tekserudí avtomattandyratyn jáne studentterdíń oqu úlgerímín baqylauǵa múmkíndík beretín platforma engízílse, basqa joǵary oqu oryndary da oqu úderísín jeńíldetetín jańa tsıfrlyq júıelerdí íske asyruda.
Jasandy ıntellekt ǵylymı zertteulerde de keńínen qoldanyla bastady. Máselen, Ál-Farabı atyndaǵy Qazaq ūlttyq unıversıtetí ǵylymı jobalarǵa beríletín ótínímderdí avtomatty túrde saralaıtyn júıení ázírlep jatyr. Sondaı-aq, ǵylymı keńes músheleríne arnalǵan ıntellektualdy kómekshí jasau jūmysy júrgízílude. Mamandardyń aıtuynsha, mūndaı jobalardyń basym bólígín studentterdíń ózderí ázírlegen. Sonyń arqasynda olar tek jańa tehnologıyalardy meńgeríp qana qoımaı, naqty ómírde kezdesetín máselelerdí sheshuge tájírıbe jınaqtap keledí.
Baǵdarlama ūıymdastyrushylary aldaǵy uaqytta úzdík jobalar arnaıy qoldau baǵdarlamalaryna qatysyp, ınvestıtsıya tartyp, tolyqqandy tehnologıyalyq óním retínde naryqqa shyǵatynyn aıtady. AI-Sana bastamasy Qazaqstanda jasandy ıntellekt salasyn damytuǵa jáne bílíktí mamandardy dayarlauǵa baǵyttalǵan mańyzdy jobalardyń bíríne aınalyp keledí.