110 elden 50 myńnan astam oqýshy qatysqan Hústondaǵy FIRST Championship 2025 halyqaralyq ınjenerlik týrnırinde Qazaqstan quramasy úsh jas sanaty boıynsha rekordtyq nátıje kórsetti, dep habarlaıdy aqshamnews.kz.
Oqý-aǵartý mınıstrliginiń málimetinshe, Qazaqstan namysyn jeti komanda qorǵady. Joǵary sanatta (12–18 jas) Almaty qalasyndaǵy Nazarbaev Zıatkerlik mektebiniń PID komandasy elimiz tarıhynda tuńǵysh ret jarystyń fınalyna ótip, eki marapat ıelendi — Motivate Award Winner jáne Division Finalist Award.
Almatydaǵy Nazarbaev Zıatkerlik mektebiniń CRISTABOL komandasy tehnıkalyq jáne tehnıkalyq emes daǵdylardyń úzdik úılesimi úshin beriletin eń bedeldi marapat — INSPIRE Award-ty jeńip aldy.
Sana Team (Almatydaǵy Bilim-ınnovasıa lıseıi) jáne Jeltoqsun (Qaraǵandy qalasyndaǵy «Murager» mektebi) komandalary robottar oıyny boıynsha 258 komandanyń ishinen TOP-20 qataryna endi.
Oqý-aǵarý mınıstrliginiń málimetinshe, orta sanatta (10–16 jas) — FIRST LEGO League Challenge týrnırinde Astana qalasyndaǵy «Skillset» mektebiniń SKILLSET komandasy Champions Award nomınasıasy boıynsha fınalıst atandy. Qaraǵandydaǵy «Murager» mektebiniń RASSLEXX komandasy Coopertition Award Winner marapatyn jeńip aldy.
Kishi sanatta (6–10 jas) — FIRST LEGO League Explore boıynsha Pavlodar qalasyndaǵy «Satýrn» mektebiniń ATLANTIS komandasy Team Model Award marapatyna ıe boldy.
FIRST Global Challenge chempıonatynyń ereksheligi — bul jarysqa ártúrli jas deńgeıindegi birneshe komanda qatysady. Qazaqstan bul chempıonatqa nebári bes jyldan beri qatysyp keledi. Soǵan qaramastan, ondaǵan jyldyq tájirıbesi bar memlekettermen teń dárejede básekege túsýdemiz, — dedi USTEM Foundation qorynyń jetekshisi Asylbek Murzahmetov.