Oqu-aǵartu mınıstrí Jūldyz Súleımenova deputattardyń balalar men jasóspírímderdíń áleumettík jelíge qoljetímdílígín shekteu turaly ūsynysyna qatysty píkír bíldírdí. Būl turaly ol Úkímettegí brıfıngte aıtyp, máselení qazír mınıstrlík deńgeıínde zerdelep jatqanyn málímdedí, dep habarlaıdy Aqshamnews.kz tílshísí.
Mınıstrdíń aıtuynsha, vedomstvoda arnaıy jūmys toby qūrylǵan, al basty maqsat – balalardy qūqyqqa qaıshy kontentten qorǵau. Ol būl tájírıbeníń bírqatar elderde qoldanylyp júrgenín atap óttí.
«Qazír shekteu máselesín qarastyryp jatyrmyz, bírneshe ūsynys bar. Jūmys toby qūryldy. Balalardy qūqyqqa qaıshy kontentten qorǵaǵymyz keledí. Būl másele ashyq túrde qoǵammen, sonyń íshínde ata-analarmen, pedagogtermen jáne BAQ ókílderímen talqylanady», – dedí Jūldyz Súleımenova.
Mınıstrlík qarastyryp otyrǵan yqtımal sharalar retínde mynalardy atady:
-
balalarǵa arnalǵan SIM-kartalardy tírkeu – qoljetímdílíktí baqylaudyń alǵashqy qadamy;
-
14 jasqa deıíngí balalar tūtynatyn kontenttí monıtorıngteu – qūqyqqa qaıshy materıaldardy anyqtap, būǵattau úshín;
-
mektepterde tsıfrlyq jáne medıasauattylyqty kúsheıtu – ınternet pen áleumettík jelílerdí qauípsíz paıdalanudy túsíndíru.
Súleımenovanyń aıtuynsha, bastama ázírge talqylau kezeńínde, naqty sheshím qabyldanbaǵan. Jūmys tobynyń alǵashqy otyrysy ótkennen keıín qosymsha aqparat jarıyalanatyny aıtyldy.
Eske salaıyq, jeltoqsan aıynda Qazaqstanda onlaın-platformalarda 16 jasqa deıíngí paıdalanushylardyń tírkeluíne tyıym engízudí kózdeıtín zań jobasy daıyndalǵany habarlanǵan. Qūjatty Mádenıet jáne aqparat mınıstrlígí ázírlegen, keıín būl shekteu áleumettík jelílerdegí tírkeuge qatysty bolatyny naqtylanǵan bolatyn.