Investıtsıyalyq joba ayasynda 2029 jyldyń sońyna deıín jol boıynda 60 zamanauı servıs nysanyn salu josparlanuda, – dep habarlaıdy aqshamnews.kz tílshísí.
Qazaqstan Respublıkasynyń Kólík mınıstrlígí jergílíktí atqarushy organdarmen bírlesíp, «PetroRetail» JShS-níń elímíz aumaǵynda zamanauı jol boıyndaǵy servıs nysandarynyń jelísín damytuǵa baǵyttalǵan ınvestıtsıyalyq jobasyn íske asyruǵa qoldau kórsetu jūmystaryn jalǵastyruda.
. Olardyń qūramyna avtojanarmaı qūyu jáne elektr quatymen zaryadtau stantsıyalary, qoǵamdyq tamaqtanu oryndary, dúkender, TIR tūraqtary jáne qonaqúıler kíredí. Jobany íske asyru jol boıyndaǵy servıstíń sapasy men qoljetímdílígín arttyruǵa, júrgízushíler men jolaushylar úshín qolaıly jaǵdaı jasauǵa, sondaı-aq kólík jáne turıstík ınfraqūrylymdy damytuǵa baǵyttalǵan.
Jobany keńeıtu ayasynda ískerlík belsendílígí joǵary ortalyqtarda, qalalarda jáne turıstík mańyzy bar lokatsıyalarda qonaqúıler salu kózdelgen. Būl negízgí avtomobıl baǵyttarynyń boıynda jáne perspektıvtí turıstík marshruttarda neǵūrlym keshendí ınfraqūrylym qalyptastyruǵa múmkíndík beredí.
Búgíngí tańda 6 qonaqúı nysanynyń qūrylysy ayaqtalyp, paıdalanuǵa beríldí.
Joba ayasyndaǵy alǵashqy qonaqúıler 2025 jylǵy 17 qyrkúıekte Jambyl oblysynyń Merkí audanynda jáne 2025 jylǵy 25 qarashada Qyzylorda oblysynyń Aral qalasynda paıdalanuǵa beríldí. Joba ayasynda sońǵy paıdalanuǵa berílgen nysan – Qaraǵandy oblysynyń Qarqaraly qalasyndaǵy qonaqúı. Ol 2026 jylǵy 15 mausymda jūmysyn bastady.
Osylaısha, jol boıyndaǵy servıs jelísín damytu dástúrlí avtojanarmaı qūyu keshenderímen ǵana shektelmeı, jol qozǵalysyna qatysushylarǵa arnalǵan tolyqqandy ınfraqūrylymdy qalyptastyruǵa baǵyt aluda. Qonaqúılerdíń, tamaqtanu oryndarynyń, dúkenderdíń, tūraqtar men elektr zaryadtau stantsıyalarynyń salynuy qauípsíz árí jaıly saparǵa qajettí jaǵdaı jasauǵa, sondaı-aq óńírlerdegí ískerlík jáne turıstík belsendílíktí arttyruǵa yqpal etedí.
Investıtsıyalyq jobany íske asyru jūmystary jalǵasuda. 2029 jyldyń sońyna deıín qalǵan nysandardy kólík qozǵalysyna degen sūranysty, turıstík áleuettí jáne tıístí aumaqtardyń áleumettík-ekonomıkalyq mańyzyn eskere otyryp, kezeń-kezeńímen salu josparlanuda.