Korporatıvtik tabys salyǵy (KTS) – Qazaqstan búdjetiniń negizgi kiris kóziniń biri bolyp qala beredi. Jańa Salyq kodeksi aıasynda bul salyqty esepteý men tóleý tártibine mańyzdy ózgerister enbek. Atap aıtqanda, ekonomıkanyń jekelegen salalarynyń ereksheligin eskere otyryp, saralanǵan mólsherlemeler qarastyrylǵan. Óńirlik komýnıkasıalar qyzmeti uıymdastyrǵan brıfıńte Almatydaǵy Memlekettik kirister departamentiniń Kameraldyq baqylaý basqarmasy kameraldyq monıtorıń bóliminiń basshysy Danıar Talǵat osylaı dep málimdedi.
Korporatıvtik tabys salyǵynyń bazalyq mólsherlemesi salyq salynatyn tabystyń 20%-y deńgeıinde qaldy. Alaıda keıbir qyzmet túrine basqa mólsherleme belgilengen. Mysaly, bank qyzmeti (bızneske nesıe berýdi qospaǵanda) men qumar oıyny bıznesiniń mólsherlemesi 25% deńgeıinde bolmaq. Áleýmettik sala, sonyń ishinde bilim berý men medısına salasy úshin 2026 jyly – 5%, 2027 jyldyń 1 qańtarynan bastap 10% tómendetilgen mólsherleme qarastyrylǵan.
Agrarlyq sektorǵa erekshe nazar aýdarylǵan. Aýyl sharýashylyǵyn qoldaý men damytý maqsatynda aýyl sharýashylyǵy ónimin óndirýshiler úshin KTS mólsherlemesi 3% deńgeıine deıin tómendetilip, aýyl sharýashylyǵy kooperatıvteri úshin bul kórsetkish 6% bolyp belgilendi. Bul qadam eldiń azyq-túlik qaýipsizdigin qamtamasyz etýde mańyzdy ról atqaratyn osy salanyń ósip-ónýin yntalandyrýǵa baǵyttalyp otyr.
Sonymen qatar, korporatıvtik tabys salyǵy bóliminiń qurylymy ózgertildi, bul árbir naqty qyzmet túri men shegerimder boıynsha tıisti normalardy qoldanýǵa múmkindik beredi. Qazaqstan Respýblıkasynyń rezıdent-zańdy tulǵalary, sondaı-aq turaqty mekeme arqyly nemese el ishindegi kózderden tabys alatyn beırezıdentter salyq tóleıtinder qatarynda qalady. Burynǵysha memlekettik mekemeler KTS tóleýshiler qataryna kirmeıdi, memlekettik orta bilim berý uıymdary bul sanattan alynyp tastaldy.
«Jańa salyq salý júıesi jekelegen salalardyń ereksheligin eskeredi. Áleýmettik mańyzy bar jáne aýyl sharýashylyǵy óndirisi salalary úshin tómendetilgen mólsherlemeler, al joǵary tabysty qyzmet túrleri úshin joǵary mólsherlemeler engizilip otyr», – dep atap ótti Danıar Talǵat.