Úkímette vıtse-premer Serík Jūmanǵarınníń tóraǵalyǵymen ótken Jer resurstary máselelerí jóníndegí komıssıyanyń otyrysynda fermerlerden jer uchaskelerín aluǵa baılanysty bírqatar máseleler qaraldy.
Negízgí másele — uákílettí organdarǵa osy sheshímderdí qabyldau kezínde qūqyqtyq negízde áreket etuge múmkíndík beretín jerdí adal jáne josyqsyz paıdalanushylardy aıqyndau úshín qūqyqtyq baza qūru, dep habarlaıdy aqshamnews.kz Primeminister.kz-ke sílteme jasap.
Ol úshín oblys ákímderíníń orynbasarlary, Bas prokuratura, Sot ákímshílígí, sybaılas jemqorlyqqa qarsy ís-qımyl agenttígí, Ūlttyq ekonomıka mınıstrlígí jáne «Atameken» ŪKP ókílderí kíretín auyl sharuashylyǵy vıtse-mınıstríníń tóraǵalyǵymen jūmys toby óńírlerde arnaıy komıssıyalar qūru jónínde ūsynystar ázírledí. Būl komıssıyalar bírqatar krıterııler negízínde jerdí paıdalanu qūqyǵyn jalǵastyru máselesín retteumen aınalysatyn bolady. Olardyń qatarynda jerdí nysanaly maqsatyna sáıkes paıdalanu, salyq tóleu, ınvestıtsıyalar tartu, auyldyq aumaqtardy damytu jáne basqalary bar. Qazírgí uaqytta barlyq zańdy rásímderdí saqtau úshín Auyl sharuashylyǵy mınıstrlígíníń erejesíne memlekettík organǵa osy arnaıy óńírlík komıssıyanyń úlgílík erejesí men ís-qımyl algorıtmín ázírleu jáne bekítu boıynsha qūzyret beru bólígínde ózgeríster engízílude. AShM jūmys ístep tūrǵan auyl sharuashylyǵy óndírushílerí úshín jer paıdalanu qūqyǵyn jalǵastyru máselesín retteu jóníndegí óńírlík komıssıyanyń erejesí men ís-qımyl algorıtmín ázírleıdí.
Sondaı-aq otyrysta Qaraǵandy jáne Pavlodar oblystaryndaǵy shekaralardyń belgílenuíne baılanysty, ıelígínde qaıtalanuy tuyndaǵan auyl sharuashylyǵy jerlerí ıeleríníń máselesí qaraldy. Talqylau qorytyndysy boıynsha Serík Jūmanǵarın dauly jerlerdíń shynaıy shekaralaryn anyqtau jáne tuyndaǵan máselení sheshu úshín barlyq mūraǵattyq qūjattar men kartografıyalyq derekterdí mūqıyat zerdeleudí tapsyrdy.
2024 jyldyń basynan berí 2 mln gektardan astam auyl sharuashylyǵy jerí memleket menshígíne qaıtaryldy. QR AShM Jer resurstaryn basqaru komıtetí jer paıdalanushylarǵa qatysty 2,8 mln ga jalpy alańda 1748-den astam jospardan tys tekseruler júrgízdí, onyń nátıjelerí boıynsha 2,2 mln ga alańda jer zańnamasyn būzushylyqtardy joyu turaly 1342 ūıǵarym engízíldí.
Būryn berílgen ūıǵarymdar boıynsha bıyl 311,3 myń ga alańda auyl sharuashylyǵy jerlerín ıgeru bastaldy. 200,4 myń ga alańda auyl sharuashylyǵy jerlerín májbúrlep alyp qoyu boıynsha sot talqylaulary júrgízílude.
Būdan basqa, jerdí paıdalanu men qorǵaudy, atap aıtqanda, Qazaqstan Respublıkasynyń jer zańnamasy salasynda jergílíktí atqarushy organdar qabyldaǵan sheshímderdíń zańdylyǵyn memlekettík baqylau sheńberínde 368,5 myń ga alqapta auyl sharuashylyǵy maqsatyndaǵy jer uchaskelerín beru turaly ákímdíkterdíń 875 zańsyz sheshímí anyqtaldy, onyń íshínde 84 sheshímníń kúshí joıyldy. Barlyq tekseruler azamattardyń ótíníshterí men prokuratura organdarynyń ūsynystary negízínde júrgízíldí. Būzushylyqtardyń negízgí sıpatyna – jerdí konkurstan tys beru, auyl sharuashylyǵy jerlerín beru boıynsha konkurstardy ótkízu tártíbín būzu, ortaq paıdalanylatyn jaıylymdyq jerlerdí bólek jer paıdalanuǵa beru jáne basqalary jatady.