Mamandardyń aıtýynsha, qazirgi tańda Qazaqstanda energıa tapshylyǵy bar jáne aldaǵy 5 jyl ishinde bul tapshylyqtyń kólemi 13 mıllıard kılovatt saǵatqa jetýi múmkin. Tyǵyryqtan shyǵýdyń eń tıimdi joly — atom elektr stansıasyn (AES) salý.
Bir ǵana AES kúnnen, jelden jáne sýdan alatyn qýat kózderine qaraǵanda birneshe esege artyq energıa óndiredi, bul onyń tıimdiligin dáleldeıdi, dep habarlaıdy aqshamnews.kz.
Qazaqstanda qýat kózderi tozyp tur. Qoldanystaǵy elektr stansıalarynyń 60%-y eskirgen jáne jyl ótken saıyn olardyń energıa óndirý múmkindigi de azaıýda. Sonymen qatar, kómir elektr stansıalarynyń ekologıaǵa keltiretin zıany orasan zor. Mysaly, táýligine 20 myń tonna kómir jaǵylǵan kezde aýaǵa 140 tonnaǵa deıin shań-tozań jáne 200 tonna azot oksıdi taraıdy. Bul jaǵdaı qorshaǵan ortaǵa jáne halyqtyń densaýlyǵyna keri áserin tıgizedi.
Qazaqstanda jańartylatyn energıa kózderiniń úlesi nebári 6%-dy quraıdy. Kún jáne jel stansıalary bar bolǵany 2900 megavatt qýat óndiredi, bul jalpy qajettilikti tolyq qamtamasyz etýge jetkiliksiz.
AES tek energıa tapshylyǵyn sheshýdiń ǵana emes, sonymen qatar, ekologıaǵa zıan keltirmeıtin taza energıa kózi bolyp tabylady. Onyń joǵary qýattylyǵy men turaqtylyǵy elimizdiń energetıkalyq qaýipsizdigin nyǵaıtýǵa jáne turaqty damýyna septigin tıgizedi. Qazaqstan úshin AES salý — energetıkalyq táýelsizdikke qol jetkizýdiń jáne ekonomıkalyq turaqtylyqty qamtamasyz etýdiń mańyzdy qadamy.