Qazaqstanda ótken respublıkalyq referendumnyń daıyndyq jáne ótkízu barysyn Táuelsíz Memleketter Dostastyǵy (TMD) baıqaushylar mıssıyasy 2026 jylǵy 24 aqpannan bastap baqylap otyrdy. Būl turaly TMD baıqaushylar mıssıyasynyń basshysy Igor Petrıshenko málímdedí, – dep habarlaıdy aqshamnews.kz tílshísí.
Onyń aıtuynsha, baıqaushylar el aumaǵynda erkín árí táuelsíz jūmys ístep, halyqaralyq baıqau qaǵıdattaryn saqtaǵan.
«Qazaqstannyń ūsynysy boıynsha Táuelsíz Memleketter Dostastyǵynyń baıqaushylar mıssıyasy 2026 jylǵy 24 aqpannan bastap respublıkalyq referendumdy daıyndau jáne ótkízu barysyna monıtorıng júrgízdí. Mıssıya el zańnamasyn jáne Dostastyq qūjattaryn basshylyqqa ala otyryp, ashyqtyq, beıtaraptyq jáne memlekettíń íshkí ísteríne aralaspau qaǵıdattaryn saqtap, erkín árí táuelsíz jūmys ístedí», – dedí Petrıshenko.
Onyń málímetínshe, mıssıya qūramynda 161 halyqaralyq baıqaushy akkredıttelgen.
«Mıssıya jūmysy ashyq árí jarıya túrde júrgízíldí. Mıssıya shtaby referendumǵa daıyndyq barysy turaly tūraqty túrde aqparattyq habarlamalar taratyp otyrdy. Sondaı-aq baspasózge arnalǵan kezdesuler ūıymdastyrylyp, būqaralyq aqparat qūraldaryna sūhbattar beríldí. Osy oraıda mıssıya jūmysy turaly jan-jaqty árí kásíbı aqparat taratqany úshín barlyq jurnalısterge, jarıyalanymdardyń dáldígí men jedeldígí úshín alǵysymdy bíldíremín», – dedí mıssıya basshysy.
TMD baıqaushylarynyń baǵalauynsha, Qazaqstannyń zańnamalyq bazasy demokratıyalyq dauys berudí ótkízu úshín qajettí jaǵdaılardy qamtamasyz etedí.
«Referendum ótkízuge qatysty zańnamalyq baza jónínde aıtsaq, mıssıya Qazaqstan zańnamasy halyqaralyq qūqyqtyń jalpyǵa ortaq qaǵıdattary men normalaryna sáıkes keledí jáne búkílhalyqtyq dauys berudí erkín árí demokratıyalyq negízde ótkízu úshín jetkílíktí qūqyqtyq negíz bolyp tabylady», – dep atap óttí ol.
Sondaı-aq onyń aıtuynsha, Ortalyq referendum komıssıyasy dauys berudí ūıymdastyru úshín barlyq qajettí sharalardy qabyldaǵan.
«Mıssıyanyń píkírínshe, Ortalyq referendum komıssıyasy referendumdy joǵary ūıymdastyrushylyq deńgeıde daıyndau jáne ótkízu úshín barlyq qajettí sharalardy qabyldady. Barlyq deńgeıdegí komıssıyalar, memlekettík organdar jáne būqaralyq aqparat qūraldary búkílhalyqtyq dauys beru protsesín keńínen jarıyalap, aqparattyq súıemeldeudí qamtamasyz ettí», – dedí Petrıshenko.
Mıssıya deregínshe, dauys beru kúní baıqaushylar eldegí kóptegen uchaskede baqylau júrgízgen.
«Referendum kúní mıssıya ókílderí Qazaqstannyń toǵyz óńíríndegí 750-den astam dauys beru uchaskesíne bardy. Sonymen qatar sheteldegí uchaskelerde de baqylau júrgízíldí. Mıssıya músheleríníń aqparaty boıynsha, barlyq uchaskeler uaqytynda ashylyp, dauys beru Memlekettík Ánūrandy oryndaudan bastalyp, ūıymdasqan árí tynysh jaǵdaıda óttí», – dedí ol.
Onyń aıtuynsha, dauys sanau rásímí zań talaptaryna sáıkes júrgízílgen.
«Dauystardy sanau rásímí zańnamaǵa tolyq sáıkes óttí. Baıqaushylar tírkegen jekelegen kemshílíkter tehnıkalyq sıpatta bolyp, uchaskelík komıssıyalar tarapynan jedel túrde túzetíldí», – dep qorytyndylady TMD baıqaushylar mıssıyasynyń basshysy.