2025 jyldyń sońǵy aıy qazaqstandyqtarǵa 9 demalys kúnín syılaıdy. Senbí-jeksenbí kúnderínen bólek seısenbíde Táuelsízdík kúníne oraı taǵy bír kún demalamyz. Al 30 jáne 31 jeltoqsan jūmys kúnderí bolyp qala beredí. Endeshe, qystyń alǵashqy aıy qazaqstandyqtar úshín taǵy qandaı jańalyqtar men ózgeríster ákelmek? Aqshamnews.kz tílshísí jeltoqsanda kútetín mańyzdy aqparattardy toptastyrdy.
Endí qazaqstandyqtar avtolızıng rásímdeı alady
1 jeltoqsannan bastap Qazaqstan azamattary úshín avtolızıngter qoljetímdí bolady. Būǵan deıín lızıngtí negízínen tek kompanıyalar paıdalana alatyn. Endí qarapaıym azamattar da jeńíl avtokólíktí lızıngke rásímdep, keıín ony tolyq satyp aluǵa nemese kólíktí kompanıyaǵa qaıta ótkízuge múmkíndík alady.
Májílís deputaty, Respublica partıyasynyń ókílí Oljas Qūsbekovtyń aıtuynsha, būl bastama QR Prezıdentí Qasym-Jomart Toqaevtyń halyqtyń áleumettík júktemesín azaıtu jóníndegí tapsyrmasy ayasynda íske asyrylyp otyr. Deputattyń sózínshe, avtolızıng baǵdarlamasy būryn jeńíldetílgen avtonesıe ala almaǵan azamattarǵa baǵyttalǵan.
"Bízdíń míndet – lızıngtíń jaı ǵana basqa sharttarmen beríletín avtokredıtke aınalyp ketpeuín qadaǵalau. Ol shynymen de halyqqa yńǵaıly, ıkemdí qarjy qūraly boluǵa tıís", – dedí Qūsbekov.
suret: Qaırat Qonyspaev
Jańa áue reısterí men loukosterler paıda bolady
Jeltoqsannan bastap Qazaqstannyń áue naryǵynda Taılandtyń jańa loukosterí – Thai AirAsia X jūmysyn bastaıdy. Áue kompanıyasy Bangkok – Almaty baǵyty boıynsha tíkeleı tūraqty reısterdí aptasyna tórt ret oryndaıdy: dúısenbí, sársenbí, beısenbí jáne jeksenbí kúnderí.
Azamattyq avıatsıya komıtetíníń málímetínshe, ūshu geografıyasyn keńeıtu jáne halyqaralyq reıster sanyn arttyru baǵytyndaǵy jūmys jalǵasyp jatyr.
Sonymen qatar, 18 jeltoqsannan bastap Belarustíń «Belavıa» áue kompanıyasy Mınsk – Almaty baǵytyndaǵy reısterín qaıta jańǵyrtady. Būl turaly kompanıyanyń bas dırektory Igor Chergınets habarlady. Būǵan deıín būl reıs oryndalǵan, sūranysta jıí bolǵan, bíraq keıínírek toqtatylǵan edí.
Almatydan Tashkentke Talgo poıyzymen baruǵa bolady
14 jeltoqsannan bastap «Jolaushylar tasymaly» AQ Almaty – Tashkent baǵyty boıynsha kúndelíktí júretín Talgo poıyzyn íske qosady. Marshrutta jaılylyq deńgeıí joǵary Talgo qūramdary paıdalanylmaq. Kún saıyn júru kestesí jolaushylarǵa saparlaryn aldyn ala yńǵaıly josparlauǵa múmkíndík beredí.
Jolda júru uaqyty – 17 saǵat 38 mınut.
Shamamen bılet baǵalary:
-
otyratyn vagondar – 10 167 teńgeden,
-
kupe – 20 711 teńge,
-
lyuks – 30 772 teńge.
Bıletterdí bilet.railways.kz resmı saıtynan nemese temírjol vokzaldarynyń kassalarynan satyp aluǵa bolady.
suret: AtyrauPress
Oqushylar qysqy kanıkulǵa shyǵady
Qazaqstandaǵy 1–11 synyp oqushylary qysqy demalysqa 29 jeltoqsannan 7 qańtarǵa deıín shyǵady. 8 qańtarda olar úshínshí toqsandaǵy sabaqtaryna qaıta oralady.
Qosymsha demalys bírínshí synyp oqushylaryna qarastyrylǵan: olar úshín 9–15 aqpan aralyǵynda qosymsha taǵy bír apta qysqy kanıkul bolady.
Al kóktemde barlyq oqushy 19–29 nauryz aralyǵynda demalady.
suret: Almaty ákímdígí
Almatylyq "Qaırat" "Olımpıakosqa" qarsy oınaıdy
Seısenbí, 9 jeltoqsanda almatylyq "Qaırat" kluby UEFA Chempıondar lıgasynyń jalpy kezeńíndegí óz alańyndaǵy matchín grektíń "Olımpıakos" komandasyna qarsy ótkízedí.
Alaıda aua raıynyń kúrdelí jaǵdaıyna baılanysty būl kezdesu, sondaı-aq belgıyalyq "Bryugge" klubyna qarsy matchí de Almatyda emes, "Astana Arenada" ótedí. Mūndaı sheshím UEFA-men bírlesíp qabyldanǵan.
Oıynnyń bastaluy – Astana uaqytymen keshkí 20:30 dep belgíleníp otyr.
suret: Qaırat Qonyspaev
Elena Rybakına Úndístandaǵy turnırge qatysady
Qazaqstandyq tennısshí Elena Rybakına Úndístannyń Bangalor qalasynda ótetín World Tennis League kórme turnıríne qatysady. Jarys 17–20 jeltoqsan aralyǵynda ótedí.
Áıelder arasynda Ispanıyadan Paula Badosa, Ukraınadan Marta Kostyuk, Polsha tennısshísí Magda Lınett jáne bírqatar úndí sportshylarynyń da qatysatyny habarlanǵan.
suret: Matthew Stockman/Getty Images for WTA
Jańa kompanıyalarǵa arnalǵan elektr energıyasy tarıfterí kúshíne enedí
1 jeltoqsannan bastap Qazaqstanda elektr energıyasyna arnalǵan jańartylǵan shektí tarıfter kúshíne enedí. Energetıka mınıstrlígí qoldanystaǵy būıryqqa ózgeríster engízíp, óndírushíler tízímíne úsh jańa kompanıyany qosty:
-
«Sintra Energy» JShS,
-
«KAZ GREEN ENERGY» JShS,
-
«Aktobe Energy Gaz» JShS.
Būl stantsıyalar úshín aldaǵy jylǵa josparlanǵan elektr energıyasyn óndíru shyǵyndary negízínde shektí tarıfter belgílenedí.
Vedomstvonyń málímetínshe, naryqqa jańa kompanıyanyń keluí bírtūtas satyp alushy úshín elektr energıyasynyń ortasha baǵasyna áser etpeıdí. Sebebí būl kompanıyalardyń generatsıya kólemí salystyrmaly túrde az bolady, sondyqtan jalpy satyp alu qūnyna aıtarlyqtaı yqpal etpeıdí.
suret: depositphotos.com
Dollar jeltoqsanda qaıta qymbattauy múmkín
Kóptegen qarjy sarapshylary jyldyń ayaǵyna qaraı, Jańa jyl qarsańynda, teńge sál álsírep, dollardyń pozıtsıyasy qaıta kúsheyuí múmkín degen píkírde ekenderín jetkízdí.
Máselen, qarjyger jáne būrynǵy bankır Sūltan Elemesov jyldyń ayaǵyna taman dollar baǵamy 540-qa deıín kóteríledí dep boljady:
"Qarasha aıynda teńgeníń nyǵayuy jalpy kútken nárse edí. Kóptegen analıtıkter mūny boljaǵan edí. Al jyl ayaǵynda ne bolady? Mysaly, Halyk Finance, qatelespesem jyldyń ayaǵynda dollarǵa 550–560 teńge dep boljam aıtyp edí. Óz basym ondaı qatty pessımıst emespín. Meníń oıymsha, jyl ayaǵyna 535–540 teńge aralyǵyndaǵy baǵamdy kóremíz", – deıdí sarapshy.
Yaǵnı sarapshylar teńge úshín asa kúrdelí stsenarıı boljamasa da, dollardyń belgílí bír deńgeıde qymbattau yqtımaldyǵyn joqqa shyǵarmaıdy.
suret: rbc.ru