Qazaqstan Prezıdentí BŪŪ Bas hatshysymen kelíssóz ótkízdí
Memleket basshysy Qasym-Jomart Toqaev beınekonferentsıya rejımínde BŪŪ Bas hatshysy Antonıu Guterrıshpen kezdesu ótkízdí, dep habarlady Almaty-akshamy.kz Prezıdenttíń akorda.kz saıtyna síltemelep.
Kelíssóz barysynda Qazaqstannyń Bíríkken Ūlttar Ūıymymen aradaǵy yntymaqtastyǵynyń basym baǵyttary talqylandy. Pandemıyaǵa jáne klımattyń ózgeruíne qarsy kúreske, sondaı-aq, óńírlík qauípsízdík pen tūraqtylyqty qamtamasyz etu úshín kúsh jūmyldyruǵa erekshe nazar audaryldy.
Qasym-Jomart Toqaev Antonıu Guterrıshtíń BŪŪ basshysy lauazymyna ekínshí merzímge ūsynǵan kandıdaturasyn Qazaqstannyń qoldaıtynyn naqtylady.
Taraptar Auǵanstandaǵy ahualǵa baılanysty óńírlík qauípsízdík pen tūraqtylyqty qamtamasyz etu máselesín jan-jaqty qarastyrdy. Memleket basshysy Auǵanstanǵa kórsetíletín kómektí jalǵastyruǵa daıyn ekenín jáne sol eldegí tūraqtylyqty qalpyna keltíruge baǵyttalǵan halyqaralyq ís-qımyldarǵa atsalysatynyn aıtty. Būl rette BŪŪ Bas hatshysy atalǵan úderístí ílgeríletudegí Ortalyq Azıya memleketteríníń, sonyń íshínde Qazaqstannyń aıryqsha rólín atap óttí.
Qasym-Jomart Toqaev BŪŪ Bas hatshysyna koronavırusqa qarsy kúres jónínde qabyldanyp jatqan sharalar, onyń íshínde, QazVac otandyq vaktsınasynyń ázírlemesí turaly málímet berdí. Sondaı-aq osy jyldyń sońyna deıín halyqtyń 55 paıyzyna ekpe salu josparyn jetkízdí. Antonıu Guterrısh koronavırus índetíne qarsy qazaqstandyq vaktsınanyń ázírlemesín jáne jappaı ekpe salu nauqanynyń tabysty júrgízílíp jatqanyn qūptady.
BŪŪ Bas hatshysy teńízge shyǵatyn joly joq damushy elder tobyna kíretín memleketterdíń múddesín qorǵauǵa baǵyttalǵan Qazaqstannyń bastamasyn qūptady. Būl, ásírese, pandemıya saldarynan tuyndaǵan daǵdarys kezínde ózektí bolyp otyr.
Qazaqstan Prezıdentí bıylǵy qarasha aıynda Glazgoda ótetín SOR26 dúnıejúzílík klımat konferentsıyasyna qatysuǵa nıettí ekenín jetkízdí. Atalǵan jıyn barysynda 2060 jylǵa qaraı Qazaqstannyń kómírtegínen ada el boluǵa qol jetkízu jóníndegí jańartylǵan ūlttyq sharalary jarıyalanady.
Antonıu Guterrısh Qazaqstannyń yadrolyq qaruǵa qarsy jahandyq máselení ílgeríletudegí kóshbasshylyǵyn joǵary baǵalady. Memleket basshysy BŪŪ Bas hatshysyn Semeı polıgonynyń jabylǵanyna 30 jyl toluyna oraı tamyz aıynda elímízde ótkízíletín halyqaralyq konferentsıyaǵa shaqyrdy.
Áńgímelesu sońynda taraptar ortaq múddení kózdeıtín auqymdy máseleler boıynsha jasalatyn tyǵyz baılanystardy jalǵastyru jónínde uaǵdalastyqqa qol jetkízdí.