Qazaqstan pedagogıkalyq ǵylymdar akademıyasy akademıkteríníń qatary tolyqty, – dep habarlaıdy aqshamnews.kz tílshísí.
Almatyda Qazaqstan Pedagogıkalyq Ǵylymdar Akademıyasynyń XXXII sessıyasynda akademıya múshelerín saılau óttí. Saılau sharty boıynsha úmítkerler ǵylymı ízdenísí negízínde bílím beruge qatysty memlekettík tūrǵyda mańyzy bar naqty ūsynys aıtuy qajet. Sessıyada pedagog-ǵalym, jurnalıst Qanat Áuesbaı «Jasandy ıntellekt dáuíríndegí medıa pedagogıka: bílím beru mazmūnyn transformatsıyalau máselelerí» taqyrybynda bayandama jasady. Óz sózínde Q.Áuesbaı JI damuy jaǵdaıynda medıa pedagogıka aldynda tūrǵan jańa maqsat-míndet turasynda aıtyp berdí. Bayandama tezısterí neırojelílerdí joǵary bílím beru júıesíne qauíp retínde emes, medıa pedagogıka mazmūnyn modernızatsıyalaudyń túrtkísí retínde qarastyryp, oqu ádístemesín soǵan saı jańartudy ūsynǵan.
Akademıyanyń jalpy jınalysy sheshímímen kópshílík dauysqa salu arqyly Qanat Áuesbaı akademıyanyń tolyq múshesí (akademıgí) bolyp saılandy. Akademık kuálígí men dıplomyn Qanat Áuesbaıǵa akademıya prezıdentí, pedagogıka ǵylymdarynyń doktory Asqarbek Qūsaıynov arnaıy tabystady. Qazaqstan Pedagogıkalyq Ǵylymdar Akademıyasynyń (QPǴA) tolyq múshesí (akademıgí) – elímízdíń bílím beru júıesí men pedagogıka ǵylymynyń damuyna ólsheusíz úles qosqan kórnektí ǵalymdar men praktık mamandarǵa beríletín joǵary ǵylymı ataq.
Q. Áuesbaı – fılologıya ǵylymdarynyń kandıdaty, «Bolashaq» baǵdarlamasymen ǵylymı-pedagogıkalyq taǵylymdamadan ótken (Ūlybrıtanıya, Norvıch q-sy). Ol QR Ǵylym jáne joǵary bílím mınıstrlígíníń bílím jáne ǵylym salasyndaǵy baqylau komıtetí ūsynǵan ǵylymı basylymdarda, Scopus ǵylymı bazasynda jarıyalanǵan kóptegen maqala avtory, QR Ǵylym jáne joǵary bílím mınıstrlígíníń «Ǵylymdy damytuǵa síńírgen eńbegí úshín» tósbelgísímen marapattalǵan.
2004 jyly qūrylǵan Qazaqstannyń Pedagogıkalyq Ǵylymdar Akademıyasynyń negízgí maqsaty – otandyq ǵalymdardyń kúsh-jígerín bíríktíre otyryp, pedagogıkalyq ǵylym júıesín damytu. Búgínde baı tarıhy bar Akademıyanyń akademıkterí qatarynda Ayagúl Mırazova, Aqylbek Kúríshbaev, Erlan Sydyqov, Janseıít Túımebaev, Erlan Aryn, Bauyrjan Jaqyp, Serík Pírálıev, Nūrlan Dulatbekov, Qaırat Zakaryanov, Dosbol Baıqonaqov jáne t.b. sıyaqty elímízdíń bílím men ǵylym salasynyń belgílí qaıratkerlerí bar.