Seulde QR Premer-mınıstríníń orynbasary – jasandy ıntellekt jáne tsıfrlyq damu mınıstrí Jaslan Madıev Ońtústík Koreyanyń ǵarysh salasyndaǵy negízgí kompanıyalarynyń bírí - CONTEC Space Group kompanıyasynyń qūrastyru-synau kesheníne bardy. Kompanıyanyń basqarma tóraǵasy Lı Sonhımen kezdesude bírlesken tehnologıyalyq jáne ınvestıtsıyalyq jobalardyń perspektıvalary talqylandy.
Kelíssózder barysynda CONTEC kompanıyasynyń «Ǵalam» jobasyna ınvestıtsıya salu josparlary, sputnıkter men olardyń komponentterín bírlesíp óndíru, sondaı-aq jerústí stansalarynyń jelísín damytu múmkíndíkterí qaraldy.
Perspektıvaly baǵyttardyń bírí Qazaqstanda sputnık komponentterín shyǵaryp, keıín olardy Ortalyq Azıya, Tayau Shyǵys jáne Europa naryqtaryna jetkízetín óndírístík hab qūru. Sondaı-aq írí gabarıttí jerústí antenna júıeleríníń óndírísín lokalızatsıyalau máselesí qarastyryluda.
Jasandy ıntellektíní qoldana otyryp, sputnıktík suretterdí óńdeu tehnologıyalaryn damytuǵa da erekshe nazar audaryldy. JI qoldanu Jerdí qashyqtan zondtau derekterín taldau jáne olardy praktıkalyq míndetterdí sheshuge paıdalanu múmkíndíkterín keńeıtedí.
CONTEC Space Group qūramyna CONTEC, Asia Pacific Satellite Corporation jáne Texas Space Communication kompanıyalary kíredí. Top Ońtústík Koreyanyń memlekettík sputnıkteríne arnalǵan borttyq kompyuterlerdí jetkízedí jáne álem boıynsha, sonyń íshínde Chılı, AQSh, Ońtústík Afrıka Respublıkasy men Avstralıyada ornalasqan 17 jerústí stansasyn basqarady.
Aldaǵy uaqytta Qazaqstanda CONTEC enshíles kompanıyasyn qūru jaıy jáne áríptestík sharttaryn odan árí pysyqtau máselesí qarastyrylmaq. Yntymaqtastyqtyń egjeı-tegjeıín Qazaqstan Respublıkasy Prezıdentíníń Koreya Respublıkasyna memlekettík sapary barysynda tanystyru josparlanuda.
Talqylanyp jatqan bastamalardy júzege asyru qazaqstandyq kásíporyndardyń ǵarysh tehnıkasyn óndíru múmkíndíkterín keńeıtuge, sputnıktík derekterdí óńdeu qūzyretterín damytuǵa jáne jańa eksporttyq naryqtarǵa shyǵuǵa yqpal etedí.
