Qazaqstan Respublıkasy Auyl sharuashylyǵy mınıstrí Aıdarbek Saparov Irannyń Qazaqstandaǵy elshísí Alı Akbar Djoukarmen kezdesu ótkízdí.
Taraptar auyl sharuashylyǵy salasyndaǵy ekíjaqty yntymaqtastyqtyń negízgí baǵyttaryn talqylap, auylsharuashylyq ónímderíníń ózara jetkízílímderín keńeıtu úshín múmkín bolatyn qadamdardy anyqtady.
Aıdarbek Saparov Qazaqstan men Iran arasyndaǵy auyl sharuashylyǵy ónímderíníń saudasy boıynsha oń dınamıkany atap óttí. 2025 jyldyń alǵashqy ekí aıynyń qorytyndysy boıynsha ekí el arasyndaǵy AÓK ónímderí saudasynyń kólemí 72,4 mıllıon AQSh dollaryn qūrady, būl 2024 jyldyń osy kezeńímen salystyrǵanda 147,9%-ǵa artyq. Qazaqstannan jetkízíletín negízgí tauarlar arasynda arpa, kúnbaǵys kúnjarasy, ūsaq jáne írí qara mal etí, ósímdík maılary, júgerí, kókóníster men būrshaq daqyldary bar.
«Bízdíń míndetímíz — auyl sharuashylyǵy salasyndaǵy ekíjaqty saudany arttyrudy jalǵastyru. Mańyzdy baǵyttardyń bírí — Iranǵa astyq daqyldaryn jetkízudí keńeıtu. Sońǵy 10 jylda Qazaqstan sízderdíń naryqqa 9 mıllıon tonnadan astam astyq, onyń íshínde bıdaı men arpa eksporttady. Bíz bıdaı eksportyn jylyna 2 mıllıon tonnaǵa deıín, al arpa eksportyn 1 mıllıon tonnaǵa deıín arttyruǵa daıynbyz», — dep atap óttí mınıstr.
Iran elshísí, óz kezegínde, auyl sharuashylyǵy salasyndaǵy yntymaqtastyqty odan árí nyǵaıtuǵa jáne ózara jetkízílímderdí belsendendíruge qyzyǵushylyq bíldírdí.
«Bíz Qazaqstanmen ózara ís-qımyldy tereńdetuge, ásírese auyl sharuashylyǵy salasynda jūmys ísteuge ūmtylamyz. Óním jetkízílímderín keńeıtu, astyq ımportyn arttyru jáne bírlesken kásíporyndar qūru — būl bízdíń el úshín basym míndetter», — dep málímdedí Alı Akbar Djoukar.
Aıdarbek Saparov barlyq ūsynylǵan bastamalardy qoldauǵa daıyn ekendígín rastady.
Kezdesu sońynda taraptar Qazaqstan men Iran arasyndaǵy jūmys toby ayasynda seríktestíktí nyǵaıtudy jalǵastyru turaly kelísímge keldí.