Qazaqstan Halyq Keńesíníń Tóraǵasy Erlan Qoshanov Batys Qazaqstan oblysyna jūmys saparymen baryp, «Jańa qoǵamdyq etıka: mádenıet, ádep, ádet» atty respublıkalyq forumǵa qatysty, – dep habarlaıdy aqshamnews.kz tílshísí.
Būl – Prezıdent tapsyrmalaryn júzege asyru ayasynda konstıtutsıyalyq organnyń óńírlerde ótkízgen alǵashqy ís-sharasy. Dıalog alańynda myńnan astam qoǵam ókílí, belsendí analar men sarapshylar bas qosty.
Aldymen Erlan Qoshanov Memleket basshysy Qasym-Jomart Toqaevtyń forum qatysushylaryna arnalǵan qūttyqtau hatyn oqyp berdí. Prezıdent respublıkalyq forumynyń ashyluymen qūttyqtap, Qazaqstan Halyq Keńesíníń ūıymdastyruymen ótkízílíp jatqan alqaly jıyn ūlttyq tárbıe men qoǵamdyq mádenıettíń sabaqtastyǵyn dárípteıtín mańyzdy ís-shara ekenín atap óttí.
«Konstıtutsıya – elímízdíń ósíp-órkendeuíne jol ashatyn qasterlí qūjat árí halqymyzdyń jańa dáuírdegí bolmys-bítímín aıqyndaıtyn temírqazyq. Sondyqtan bárímízdíń aldymyzda tūrǵan asa mańyzdy maqsat – Konstıtutsıyamyzdyń basty qūndylyqtary men mańyzyn halyq arasynda, ásírese, jastarǵa jan-jaqty túsíndíríp, keń auqymda dárípteu. Óıtkení, qazírgídeı qūbylmaly, tūraqsyz jáne kúrdelí uaqytta memlekettígímízdíń myńdaǵan jyldyq tarıhy men dástúrín jadymyzda saqtaı otyryp, jūrtymyzdyń boıyna ozyq oıly ūltqa tán ıgí qūndylyqtardy síńíru asa ózektí míndet sanalady» – delíngen qūttyqtauda.
Sonymen qatar Memleket basshysy órkenıettí el bolu qasterlí Otanymyzdyń múddesí úshín tūtas qoǵam bolyp tabandy eńbek etuden bastalatynyna erekshe mán bergen. Sebebí, eńbektí qadírleıtín qoǵamnyń azamattary ár íske zor jauapkershílíkpen, janashyr júrekpen jáne adal nıetpen qaraıtyny sózsíz.
«Bíz tūtas qoǵam bolyp «Taza Qazaqstan» jalpyūlttyq bastamasyn qolǵa aldyq. Búkíl el boıynsha tazalyq ís-sharalaryn júrgízíp, osy qasıettí ūǵymnyń tereń maǵynasyn jūrtymyzdyń, ásírese, jastarymyzdyń sanasyna síńíre bastadyq. Osylaısha, tazalyq ūlt bolmysynyń ajyramas bólígíne, halqymyzdyń myzǵymas qūndylyǵyna aınaluda. Bíz zań men tártíp ústemdík qūratyn, bílím men ǵylymǵa, ınnovatsıyaǵa basa mán beretín, bírlígí bekem, Ádílettí, Qauípsíz, Kúshtí árí Taza Qazaqstandy qūryp jatyrmyz. Osy mańyzdy mıssıyany júzege asyruǵa memlekettík mekemelermen qatar, tūtas qoǵam, yaǵnı ár otbasy, ár azamat, sondaı-aq qoǵam belsendílerí, ūstazdar qauymy jáne eríktíler kúsh bíríktíríp, belsene atsalysuy kerek. Búgíngí basqosuda aıtylatyn ūtymdy ūsynystar men tyń ıdeyalar osy maqsat-míndetterdí íske asyruǵa yqpal etedí dep senemín», – delíngen Prezıdent qūttyqtauynda.
Erlan Qoshanov óz sózínde Memleket basshysy alǵa qoıǵan auqymdy míndetterdí íske asyruda Halyq Keńesíníń belsene atsalysatynyn atap óttí. Konstıtutsıyalyq konsultatıvtík organnyń basty mıssıyasy – jūrtshylyqty Prezıdent reformalary men bastamalary tóńíregínde toptastyru.
«Búgíngí áńgíme – Otan men otbasy turaly áńgíme, bolashaq turaly áńgíme. Ádep pen ádet, qoǵamdyq etıka arqyly ūlttyń jańa sapasyn qalyptastyru turaly keńes. Konstıtutsıyamen bírge qoǵamnyń sana-sezímí men dúnıetanymynda da tereń árí mańyzdy ózgeríster oryn alyp jatyr. Prezıdent árbír qazaqstandyqtyń tuǵan tílín qūrmetteıtín, salt-dástúrín saqtaıtyn, úlkendí syılap, bílímge ūmtylatyn, sonymen qatar álemge ashyq azamat bolǵanyn qalaıdy. Osy qasıetter otbasyndaǵy tárbıeden bastalyp, «Zań men tártíp», «Taza Qazaqstan», «Adal azamat» qaǵıdattary arqyly qalyptasuy tıís», – dedí E. Qoshanov.
Halyq Keńesíníń Tóraǵasy Prezıdent Qasym-Jomart Toqaevtyń reformalary jetí jyl íshínde el ómíríne eleulí ózgeríster ákelgenín aıtty. Jańa ekonomıkalyq sayasat ekonomıkany ártaraptandyruǵa, áleumettík ádíldíktí nyǵaıtuǵa múmkíndík berdí. Keıíngí jetí jylda Qazaqstannyń íshkí jalpy ónímí 181,7 mlrd dollardan 306 mlrd dollarǵa deıín óstí. Jan basyna shaqqandaǵy íshkí jalpy óním 9,8 myń dollardan 15 myń dollarǵa jettí. 25 myń shaqyrym jol salyndy. 1 300 jańa mektep boı kóterdí, «Keleshek mektepterí» jobasy ayasynda 217 mektep salyndy.
Prezıdent bastamasymen táuelsízdík jyldarynda būryn-sońdy bolmaǵan auqymdy reformalar júzege asyryldy. Búgínde Qazaqstan ekonomıkalyq tūrǵyda da, áleumettík, mádenı-ruhanı tūrǵyda da damudyń jańa kezeńíne qadam basuda.
«Osy jańǵyru úderísteríníń sharyqtau shegí – jańa Halyq Konstıtutsıyasy. Onymen bírge búgínde adamdardyń júregí men sanasynda tereń árí mańyzdy ózgeríster oryn aluda. Reformalar elímízdí búgín ózgertse, qūndylyqtar onyń elu jyldan keıín qandaı bolatynyn aıqyndaıdy. Sondyqtan Prezıdent kúndelíktí ómírdíń ajyramas bólígíne aınaluǵa tıís qoǵamdyq qūndylyqtar men baǵdarlardy júıelí túrde qalyptastyryp keledí», – dedí Erlan Qoshanov.
Otyrys barysynda forum qatysushylary tárbıe máselesí, qoǵamdaǵy adamgershílík qūndylyqtardyń rólí, bílím beru jáne kítap oqu mádenıetín damytu sıyaqty bírqatar mańyzdy máselení ortaǵa saldy.
Qazaqstan Halyq Keńesíníń múshesí Natalya Dementeva áskerı bólímderdegí moraldy-tūrmystyq jaǵdaılardy jaqsartu máselesín kóterdí.
Būl baǵyt Halyq Keńesíníń jūmysy ayasynda odan árí jalǵasyn tabady. Áskerı bólímderdegí jaǵdaıdy zerdelep, áskerı qyzmet ótkerudí kezeń-kezeńímen jaqsartu sharalaryn aıqyndau josparlanyp otyr.
Taǵy bír mańyzdy másele – jastardy jūmyspen qamtu. «Jańa múmkíndík» qoǵamdyq bírlestígíníń jetekshísí Arman Túlkíbaev sūranysqa ıe mamandyqtardy meńgeríp, jūmysqa ornalasuǵa kómektesetín «JOLTAP» jobasyn íske asyru tájírıbesímen bólístí. Osy tájírıbení keńínen qoldanu perspektıvalaryna, sonyń íshínde auyl jastarynyń kásíbı bílím alyp, jūmysqa ornalasu múmkíndíkterín keńeıtuge mán beríldí.
Kezdesu barysynda Halyq Keńesíníń múshesí, Respublıkalyq Analar alqasynyń tóraıymy Nazıpa Shanaı jáne Qūryltaı deputaty Snejanna Imasheva men oblys basshylyǵy da sóz sóıledí.
Sonymen qatar «Naırı» QR armyan mádenı ortalyqtarynyń qauymdastyǵy» ZTB Analar alqasynyń tóraǵasy Tatyana Muradyan qoǵamdyq etıka turaly sóz qozǵasa, «Túrkístan oblystyq ata-analar qauymdastyǵy» qoǵamdyq bírlestígíníń tóraǵasy Aqbayan Jakıpova áıelder qūqyǵyn qorǵau máselesín kóterdí. Al qoǵam qaıratkerí, auǵan etnomádenı bírlestígíníń múshesí Anna Mohammad adal azamat turaly óz paıymymen bólísíp, Amangeldí auyldyq kítaphanasynyń meńgerushísí Gúlsím Iskalıeva kítap oqıtyn ūlt máselesín qozǵady.
Forum memleket pen qoǵam arasynda ashyq píkír almasu alańyna aınaldy. Alqaly jıyn qoǵamdyq qūndylyqtardy nyǵaıtuǵa, azamattyq jauapkershílíktí arttyruǵa jáne qoǵamdyq ádeptí qalyptastyruǵa baǵyttalǵan el damuynyń strategıyalyq baǵyttary men naqty bastamalardy ūshtastyrdy.