Mıssıya múshelerí Almatydaǵy saılau uchaskelerín aralap, dauys beru jáne dauystardy sanau barysyn qadaǵalady, dep habarlaıdy aqshamnews.kz tílshísí.
Túrkí memleketterí Parlamenttík Assambleyasynyń halyqaralyq mıssıyasy Qazaqstandaǵy Qūryltaı saılauynyń ūlttyq zańnama men halyqaralyq talaptarǵa saı, bírqalypty jaǵdaıda ótkenín málímdedí. Mıssıya múshelerí Almatydaǵy saılau uchaskelerín aralap, dauys beru jáne dauystardy sanau barysyn qadaǵalady. Sonymen qatar múmkíndígí shekteulí azamattardyń saılauǵa qatysuyna qandaı jaǵdaı jasalǵanyna nazar audardy. Qyrǵyzstan, Ázírbaıjan jáne Túrkıya ókílderí sapar qorytyndysyn Almatyda ótken baspasóz máslıhatynda jarıyalady.
TúrkPA-nyń Bílím, mádenıet, áleumettík jáne gumanıtarlyq máseleler jóníndegí komıssıyasy tóraǵasynyń míndetín atqarushy, Qyrǵyz Respublıkasy Jogorku Keńeshıníń deputaty Ūlyqbek Qarybek uulu halyqaralyq baıqaushylardyń saılau uchaskelerín erkín aralap, ondaǵy jūmys barysymen tanysuyna barlyq múmkíndík jasalǵanyn aıtty.
«Jūmysymyzǵa memlekettík organdar tarapynan eshqandaı kedergí bolǵan joq. Saılau uchaskeleríne erkín kíríp, bízdí qyzyqtyrǵan barlyq jaǵdayatty óz kózímízben kóríp, baqyladyq. Keshkísín dauys sanau barysyna da kuá boldyq. Dauys beru ashyq óttí. Ūlttyq zańnama men halyqaralyq talaptarǵa qaıshy áreketterdí baıqamadyq», – dedí Ūlyqbek Qarybek uulu.
TMPA-nyń Qūqyqtyq máseleler jáne halyqaralyq qatynastar jóníndegí komıssıyasynyń múshesí, Túrkıya Ūly Ūlttyq Májílísíníń deputaty Fılız Kylych halyqaralyq mıssıyanyń baıqau nátıjeleríne toqtaldy.
«Bíz barǵan uchaskelerde dauys beru bírqalypty árí asqan ūıymshyldyqpen óttí. Saılaushylar erkín kelíp, tańdauyn esh kedergísíz jasady. Dauys beru qūpıyasy saqtalyp, zańda belgílengen tártíp talaptary oryndaldy. Baıqau nátıjesínde Almatydaǵy top Qūryltaı saılauy Qazaqstan Respublıkasynyń zańnamasy men halyqaralyq saılau talaptaryna saı óttí degen tūjyrymǵa keldí», – dedí Fılız Kylych.
TúrkPA-nyń Bílím, mádenıet, áleumettík jáne gumanıtarlyq máseleler jóníndegí komıssıyasynyń múshesí, Ázírbaıjan Mıllı Májílísíníń deputaty Hıkmet Mamedov mıssıya músheleríníń alty saılau uchaskesín aralaǵanyn aıtty. Ol Qazaqstannyń jańa zań shyǵarushy organyna «Qūryltaı» ataluyna da erekshe mán berdí.
«Qūryltaı – tamyry tereń kóne túrkí sózí. Babalarymyz eldík mańyzy bar máselelerdí aqyldasyp, ortaq sheshímge kelu úshín qūryltaıǵa jınalǵan. Búgínde osy míndettí Parlament atqarady. Al «Qūryltaı» atauy halyqtyń erkín, eldík máselelerdí sheshuge atsalysuyn bíldíredí. Qazaqstannyń joǵary zań shyǵarushy organyna osyndaı tarıhı atau berílgeníne shyn júrekten quanyshtymyn», – dep Hıkmet Mamedov ózíníń júrekjardy lebízín bíldírdí.
Halyqaralyq baıqaushylar múmkíndígí shekteulí azamattardyń saılauǵa qatysuyna jasalǵan jaǵdaıǵa da nazar audardy. Saılau uchaskelerí pandustarmen jabdyqtalyp, Braıl qarpíndegí arnaıy úlgíler men ózge de kómekshí qūraldar qarastyrylǵan. Ortalyq saılau komıssıyasynyń aqparattyq materıaldary men otyrystary da ymdau tílíne audarylǵan.
Mıssıya múshelerí áıelder, jastar jáne múmkíndígí shekteulí azamattardyń ókíldígín qamtamasyz etuge baǵyttalǵan zańnamalyq talaptarǵa da toqtaldy. Zań boıynsha atalǵan úsh sanattyń partıyalyq tízímdegí jalpy úlesí kemínde 30 paıyz boluy kerek. Būl talap deputattyq mandattardy bólu kezínde de qoldanylady.
TúrkPA Bas hatshysy orynbasarynyń míndetín atqarushy, Qyrǵyz Respublıkasy parlamentíníń ókílí Bektūr Bazakechov mıssıya jūmysynyń táuelsízdík pen beıtaraptyq qaǵıdattaryna negízdelgenín aıtty.
«Saılau barysyna aralaspau jáne onyń qatysushylaryna sayası tūrǵydan baǵa bermeu Halyqaralyq baıqaushynyń basty ūstanymy. Bízdíń míndetímíz – saılaudyń el zańnamasy men memlekettíń halyqaralyq míndettemeleríne qanshalyqty saı ótkeníne ádíl baǵa beru. Osy jūmys barysynda bíz beıtaraptyqty, derbestíktí, jarıyalylyqty jáne saılau barysyna aralaspau qaǵıdatyn ūstandyq. Būl saılau Qazaqstannyń sayası ınstıtuttaryn odan árí damytu jolyndaǵy mańyzdy kezeń boldy», – dedí Bektūr Bazakechov.
TúrkPA ókílderí halyqaralyq baqylaushylardyń jūmysyna yńǵaıly jaǵdaı jasaǵany úshín Qazaqstan tarapyna alǵys bíldíríp, el azamattaryn tūńǵysh bír palataly Qūryltaıdyń qūryluymen qūttyqtady.