Búginde Qazaqstanda sport salasynyń damý qarqyny baıqalǵanymen, sheshimin tappaǵan kúrdeli máseleler áli de bar. El boıynsha sport mektepteri men túrli seksıalar kóbine iri qalalarda shoǵyrlanǵan.
Al aýyldyq jerlerde sport ınfraqurylymynyń jetkiliksizdigi - jastardyń sportpen júıeli túrde aınalysýyna kedergi keltirip otyr. Bul - buqaralyq sportty damytýda úlken tosqaýyl.
Taǵy bir ózekti másele - kásibı sport mamandarynyń jetispeýshiligi men olardyń bilim-biliginiń zaman talabyna saı bolmaýy. Kóptegen óńirlerde bilikti jattyqtyrýshylar tapshy nemese múlde joq. Al bar jattyqtyrýshylardyń ózi jańa ádistemeler men halyqaralyq standarttardan alshaq. Bul jaǵdaı jasóspirimder sportyndaǵy sapanyń tómendeýine ákelýi múmkin.
Sonymen qatar, jastar arasynda dene belsendiliginiń tómendeýi, gadjetke táýeldilik jáne salaýatty ómir saltyn ustanbaý - qoǵam úshin alańdatarlyq jaǵdaıǵa aınalyp otyr. Bul ulttyq densaýlyq pen bolashaq chempıondardyń qalyptasýyna keri áser etedi.
Memleket bul baǵytta naqty qadamdar jasap jatyr. Jańa sport keshenderi men fıtnes ortalyqtary salynyp, halyqaralyq jarystar ótkizilip jatyr. Prezıdent Qasym-Jomart Toqaevtyń bastamasymen buqaralyq sportty damytý jáne árbir mektepte dene shynyqtyrý sabaqtarynyń sapasyn arttyrý qolǵa alynýda. Buǵan qosa, aýyl jastarynyń sportqa qoljetimdiligin keńeıtý úshin keshendi baǵdarlamalar qajet.
Qazaq sportynyń qarqyndy damýy úshin tómendegi basym baǵyttarǵa nazar aýdarý qajet:
1. Aýyl sportyn damytý - ár aýylda sport alańdary, seksıalar men úıirmeler ashý;
2. Mamandar daıarlaý men qaıta oqytý - zamanaýı ádistemelermen oqytylǵan jattyqtyrýshylar sanyn kóbeıtý;
3. Balalar jáne jasóspirimder sportyn qarjylandyrý - jas býynǵa arnalǵan sporttyq baǵdarlamalar men jarystarǵa qoldaý kórsetý;
4. Mekteptegi dene tárbıesin kúsheıtý - oqý baǵdarlamasyn jetildirý, sapaly kadrlar tartý;
5. Aqparattyq nasıhat - sporttyń qoǵamdaǵy rólin arttyrý maqsatynda buqaralyq aqparat quraldary arqyly belsendi túsindirý jumystary júrgizý.
Eger osy baǵyttar júıeli túrde júzege assa, Qazaqstan bolashaqta álemdik sport arenalarynda básekege qabiletti elderdiń qatarynan tabylary sózsiz.