Prezıdent egemen elímíz Qaruly kúshterge zor sením artyp otyrǵanyna toqtaldy, – dep habarlaıdy aqshamnews.kz tílshísí.
– Búgínde Qazaqstannyń aıbyndy armıyasy batyr babalardyń dańqty jolyn laıyqty jalǵastyryp keledí. Saıypqyran sarbazdarymyz – qasıettí Táuelsízdígímízdíń berík qalqany. Olar elímízdíń tynyshtyǵyn, jerímízdíń tūtastyǵyn qas qaqpaı kúzetíp tūr. Kúshtík qūrylymdar zań ústemdígín, qoǵamdyq tártíp pen ūlttyq qauípsízdíktí qamtamasyz etude. Qūtqarushylar qaterden qaımyqpaı azamattardyń amandyǵy úshín tynymsyz eńbek etíp júr. Jauyngerlerímíz kúrdelí míndetterdí tabysty oryndap, halyqaralyq tūraqtylyqty nyǵaıtu ísíne de zor úles qosuda. Qazaqstan – Bíríkken Ūlttar Ūıymynyń bítímgerlík mıssıyasyn derbes oryndau mártebesíne ıe bolǵan Táuelsíz Memleketter Dostastyǵy íshíndegí jalǵyz memleket. Būl álem elderíníń qazaq armıyasyna degen senímí joǵary ekenín kórsetedí, – dedí Memleket basshysy.
Qasym-Jomart Toqaev sarbazdarymyz arnaıy jasaqtar men kúshtík qūrylymdar arasyndaǵy jahandyq dodalarda tamasha jetístíkke qol jetkízíp júrgenín aıtty.
– Bıyl Dubaıda ótken auqymdy halyqaralyq jarysqa elímízdíń bes komandasy qatysyp, júldemen oraldy. Baıraqty básekede bírínshí jáne ekínshí oryndy Qazaqstan qūramasy enshíledí. Ásírese, áıelder arasynda top jarǵan «Tomırıs» komandasynyń qarym-qabíletíne jahan jūrty tántí boldy. Mūnyń bárí de – ruhy myqty, qajyr-qaıraty mol, Otan aldyndaǵy antqa adal sarbazdarymyzdyń eren eńbegíníń jemísí ekení aıqyn. Memleket osyndaı aıbyndy jauyngerlerímízdí qashanda qoldaıdy. Būl – eń aldymen, el múddesí úshín, yaǵnı, ūltymyzdyń keleshegí úshín asa mańyzdy míndet, – dedí Prezıdent.