Memleket basshysy kelíssóz ayasynda Kambodja Premer-mınıstrí Hun Manettíń Qazaqstanǵa alǵashqy sapary ekíjaqty qarym-qatynasty jandandyruǵa jol ashatynyn jáne ortaq nıettí naqty íske ūlastyruǵa múmkíndík beretínín atap óttí, – dep habarlaıdy aqshamnews.kz tílshísí.
– Bıyl ekí el arasynda dıplomatıyalyq baılanys ornaǵanyna 32 jyl tolyp otyr. Osy jyldar íshínde memleketterímíz syndarly sayası dıalog júrgízíp, ózara tıímdí yntymaqtastyqty dáıektí túrde ílgeríletíp keledí. Bízdíń aldaǵy qadamdarymyz búgín qabyldaıtyn Bírlesken málímdemede kórínís tapqan. Sondaı-aq bírqatar qūjatqa qol qoyamyz. Qazaqstan Kambodjany Ońtústík-Shyǵys Azıyadaǵy senímdí seríktesí jáne ASEAN ūıymymen yqpaldastyqty keńeıtudegí mańyzdy elderdíń bírí retínde qarastyrady, – dedí Prezıdent.
Qasym-Jomart Toqaev kezdesude Qazaqstan men Kambodjanyń halyqaralyq arenada, sonyń íshínde BŪŪ janyndaǵy ekí eldíń tūraqty ókíldíkteríníń qyzmetí ayasynda belsendí qarym-qatynasty jolǵa qoıǵanyn atap óttí.
Prezıdent BŪŪ Bas assambleyasynyń kún tártíbíndegí bírqatar másele boıynsha Qazaqstannyń bastamalaryna Kambodjanyń qoldau kórsetkenín joǵary baǵalady.