Memleket basshysy sóz basynda qonaqjaılyq tanytyp, Samıtti joǵary deńgeıde uıymdastyrǵany úshin Ózbekstan Prezıdenti Shavkat Mırzıóevke alǵys aıtty, - dep habarlaıdy Aqshamnews.kz.
Qasym-Jomart Toqaev Ilham Álıevke iltıpat bildirip, Ázerbaıjannyń atalǵan keńeske tolyq múshe retinde qosylýyn tarıhı sheshim dep baǵalady. Sondaı-aq Bakýdiń jańa statýsta aımaq yntymaqtastyǵyn keńeıtýge aıtarlyqtaı úles qosatynyna senim artty.
Prezıdent Ortalyq Azıa memleketteri basshylarynyń Konsýltatıvtik kezdesýleri óz tıimdiligin dáleldegenin aıtty.
– Qazir Ortalyq Azıa aýqymdy transformasıa kezeńin ótkerip jatyr. Jabyq shekaralar men oqshaýlanýdyń ýaqyty ótti. Muny senimmen aıtýǵa bolady. Ortaq kúsh-jigerdiń arqasynda óńirdiń ishki birligi artty. Bul elderimizdiń damýyna jáne halyqaralyq yntymaqtastyqqa keńinen jol ashty. Álemniń aldyńǵy qatarly memleketteri óńirdiń jahandyq úderisterde mańyzdy ról atqaratynyn moıyndaıdy. Sondyqtan «Ortalyq Azıa plús» formatyna qyzyǵýshylyq artyp keledi. Buǵan bıyl negizgi sheteldik seriktestermen ótken samıtter dálel bola alady. Meniń oıymsha, mundaı seriktestiktiń basty maqsaty – óńirdegi turaqtylyqty nyǵaıtý jáne ornyqty progres úshin jaǵdaı jasaý, elderimiz ben halyqtarymyzdyń ál-aýqatyn, baqýatty turmysyn qamtamasyz etý. Ortalyq Azıanyń áleýmettik-ekonomıkalyq turǵydan qarqyndy damyǵan ári jan-jaqty yntymaqtastyq pen beıbitshilik ornaǵan berekeli óńir retindegi mártebesin nyǵaıtýdy kózdeımiz, – dedi Prezıdent.