Ǵalymdar qara shokoladtyń adam aǵzasyna áserin anyqtady. Zertteý Aging jýrnalynda jarıalanǵan, - dep habarlaıdy Aqshamnews.kz tilshisi "Gazeta.Ru" basylymyna silteme jasap.
Jańa zertteý nátıjesine saı, munda negizgi róldi kakao-burshaǵynda bolatyn alkaloıd - teobromın atqarýy múmkin.
Zertteýshiler eki táýelsiz regıstrden alynǵan 1669 adamnyń qan úlgilerin taldady. Olar kofeın men teobromın metabolıtteriniń konsentrasıasyn, sondaı-aq, DNQ-nyń metıldenýindegi ózgeristerge negizdelgen bıologıalyq jas kórsetkishteriniń eki markerin baǵalady. Onyń biri jalpy "epıgenetıkalyq jasty", ekinshisi - hromosomalardyń ushyndaǵy qorǵanysh bólikteri sanalatyn telomerlerdiń kúıin kórsetken.
Nátıjeler boıynsha: qanda teobromın deńgeıi joǵary adamdarda bıologıalyq jas orta eseppen hronologıalyq jasynan tómen bolǵan. Al kofeın de, kakao men kofede kezdesetin basqa qosylystar da mundaı baılanys kórsetpegen.
"Bizdiń zertteýimiz qara shokoladtyń negizgi komponentteriniń biri bıologıalyq qartaıýdyń baıaýyraq júrýimen baılanysty ekenin anyqtady", - dedi Koróldik London kolejiniń zertteýshisi Djordana Bell.
Ol bul "kóbirek shokolad jeýge" shaqyratyn usynys emes ekenin, ásirese tátti shokoladqa qatysty saq bolý keregin atap ótti.
"Degenmen bul derekter kúndelikti tutynatyn ónimderdiń densaýlyqty saqtaýǵa jáne uzaq ári sapaly qartaıýǵa qalaı áser etýi múmkin ekenin túsinýge kómektesedi", - dedi ǵalym.
Avtorlar bıologıalyq jas - resmı bekitilgen bir ǵana kórsetkish emes, aǵzanyń jalpy jaǵdaıyn beıneleıtin ólshem ekenin aıtty: ol neǵurlym tómen bolsa, tinder men aǵzalardyń qyzmeti soǵurlym uzaq saqtalady.
Sonymen qatar, shokoladty "qartaıýǵa qarsy qural" retinde qarastyrýǵa bolmaıdy: kóp mólsherde ol qant pen maıy joǵary, kalorıasy mol ónim bolyp qala beredi.
"Endigi qadam - osy baılanystyń artynda qandaı mehanızmder turǵanyn jáne taǵamdyq metabolıtterdiń epıgenommen qalaı ózara árekettesetinin túsiný", - dedi klınıkalyq genetık Ramı Saad.
Ǵalymdar teobromın basqa alkaloıdtar sıaqty genderdiń belsendiligin retteýge yqpal etýi múmkin dep boljaıdy, al bul óz kezeginde qabyný, zat almasý jáne qartaıý úderisterine áser etýi yqtımal. Aldaǵy ýaqytta zertteýshiler teobromınniń jeke ózi áser ete me, álde kakao quramyndaǵy polıfenoldar sıaqty basqa komponenttermen birge yqpal ete me - sony anyqtaýdy josparlap otyr.