«Kítap oqıtyn ūlt» jobasy bastalǵaly Qaraǵandy oblysynyń tūrǵyndary baıqauǵa erekshe qyzyǵushylyq tanytuda. Búgínge deıín oblys boıynsha 67 438 adam tírkeldí, onyń íshínde: 30 534 oqushy, 7 862 student, 17 000 pedagog, 10 987 otbasy jáne 1 439 memlekettík qyzmetker bar.
Joba qatysushylary arasynda shynaıy ıntellektualdy báseke qalyptasyp, kítap oqu dástúrge aınalyp, óńírde jańa mádenıet qalyptasuda. Audandar men qalalar arasynda oqylǵan kítaptar sany boıynsha kóshbasshylar – Abaı audany, Temírtau jáne Shahtınsk qalalary.
Ár qala men audanynda oqyrman klubtary qūrylyp, qatysushylar oqyǵan shyǵarmalardy taldap, baıqauǵa daıyndyq ústínde. Būl sharalar óńírlík kítaphanalardyń jūmysyn jandandyryp, qatysushylardyń bílím deńgeıín kóteruge jáne synı oılau qabíletín damytuǵa septígín tıgízedí.
Mysaly, Qarqaraly audanynyń Sabyrovtar otbasy kesh saıyn oqyǵan kítaptaryn bírge talqylap, qyzyqty tūstaryn bólísudí ádetke aınaldyrǵan: «Jobaǵa qatysqaly berí telefonǵa múlde uaqyt bólmeıtín boldym. Būryn árkím óz sharuasymen júrse, qazír bír shyǵarmanyń tóńíregínde oı bólísíp, bír-bírímízdí tyńdaımyz», – deıdí otbasynyń kíshkentaı múshesí Sabyr Erkejan.
Ūstazdar da jobada belsendílík tanytyp otyr. M. Jūmabaev atyndaǵy gımnazıya mūǵalímí Altynbek Bekzat Japataıūly: «Balalyq shaǵymnan kítap oqudy jaqsy kóretínmín. Bíraq sońǵy jyldary uaqyt tapshylyǵy men jūmystyń kóptígíne baılanysty súıíktí ísíme kóńíl bólmeı qalǵanmyn. Endí qaıtadan qūlshynys oyandy, kítap oqudyń qyzyǵyna qaıta dendeı bastadym. Qyzyǵushylyq bolsa, uaqyt tabuǵa bolady eken».
Joba bastalǵanda mektep oqushylary 15 kítapty oquǵa kóbsíngenímen, uaqyt kele būl maqsatqa qol jetkízudíń múmkín ekeníne kóz jetkízgen. Mámálı Toqtamūrat, «Ozat» mamandandyrylǵan mektep-lıtseıíníń 10 synyp oqushysy: «Tízímdegí kítaptardy bírden oqyp shyǵu múmkín emes. Bíraq maqsat qoıyp, júıelí jospar qūryp, az-azdan úzdíksíz oqysań, eshteńe qol jetpeıtín emes. Teatr úıírmesíne qatysamyn, oqyǵan shyǵarmamdy sahnada keıípker retínde elestetemín. Būl kítaptar meníń óneríme shabyt beredí».
№2 «Bílím-Innovatsıya» lıtseı-ınternatynyń oqushysy Nūrtíleu Nazerke: «Men úshín būl baıqau aqshalaı júlde emes, jan azyǵyna aınaldy. Ár kítaptan alǵan áserímdí qaǵazǵa túsíríp, oqyǵanymdy pysyqtaımyn. Keıípkerler men avtorlardyń oılary tereń tolǵanysqa jeteleıdí. Qazaq, orys, aǵylshyn jáne túrík tílderínde oqı otyryp, kóp paıda aldym».
E.A. Bóketov atyndaǵy ūlttyq zertteu unıversıtetíníń 4-kurs studentí Dılara Amangeldíqyzy: «Bír mausymda 15 kítap oqu – bílímdí ǵana emes, tíldík qabíletímízdí, sózdík qorymyzdy jáne analıtıkalyq oılaudy damytady. Kítaptardy debat formatynda qorǵau – oıdy júıelí jetkízuge, píkírtalas mádenıetín meńgeruge jáne synı oılaudy shyńdauǵa múmkíndík beredí. Mūndaı joba jastardyń ruhanı damuyna baǵyttalǵan úlken qadam».
Jobanyń negízgí maqsaty – kítap oqu mádenıetín qalyptastyryp, bílím men ruhanıyatqa degen súıíspenshílíktí arttyru. Qaraǵandy oblysy osy bastamamen elímízde kítap oqu trendín qalyptastyryp kele jatqan óńírge aınaldy.
Jobany «Amanat» partıyasynyń qoldauymen «Kítap oqıtyn ūlt – Chıtayushchaya natsıya» qoǵamdyq qory jáne Qaraǵandy oblysy ákímdígí júzege asyruda. Óńírlík demeushí – «RGB Group» jáneQNP kompanıyalary.
2025 jyldyń qyrkúıegínde «Kítap oqıtyn ūlt» jobasy pılottyq túrde Qostanaı, Qaraǵandy oblystary men Shymkent qalasynda bastau alǵan bolatyn. Qazírgí tańda úsh óńírde jobaǵa 189 myńnan astam adam qatysuda, joba qorytyndysy 2026 jylǵy sáuírde shyǵarylady.