Nysandy bıylǵy tamyz aıynda tabystamaq, dep habarlaıdy aqshamnews.kz tílshísí.
Óńírlík kommunıkatsıyalar qyzmetíníń ūıymdastyruymen Nauryzbaı audanynda BAQ ókílderíne arnalǵan baspasóz tury óttí. Audan ákímí Nazıra Toǵyzbaeva jurnalıstermen bírge nysandardy aralap, audandaǵy íske asyp jatqan negízgí jobalardy, alǵa qoıǵan jospary turaly bayandap berdí.
Baspasóz turynda bírínshí jol túsken nysan Qalqaman-2 shaǵyn audanyndaǵy tūrǵyn úı keshení boldy. Mūnda 2029 jylǵa deıíngí tūrǵyn úı-kommunaldyq ınfraqūrylymdy damytu tūjyrymdamasy ayasynda halyqqa qyzmet kórsetu nysany bar kóp páterlí tūrǵyn úı salatyn úlken jobany qolǵa alypty.
2024 jyldyń sáuír aıynda bastalǵan jobanyń bas merdígerí – «QazQūrylysPodryad» JShS. Nysandy bıylǵy tamyz aıynda tabystamaq.
Audan ákímíníń aıtuynsha, áleumettík mańyzy zor būl joba almatylyqtardy qoljetímdí árí jaıly tūrǵyn úımen qamtamasyz etpek. Qazír jetí jerde audany 34 myń sharshy metrden asatyn 594 páterlí tūrǵyn úı boı kóterdí.
«Memleket basshysy bírneshe ret atap ótkendeı, sapaly árí qoljetímdí ınfraqūrylym men qoljetímdí tūrǵyn úı salu basym baǵyt bolyp otyr. Nauryzbaı audanynda sońǵy bes jylda áleumettík osal toptarǵa ǵana 5600-den astam páter beríldí. Sońǵy úsh jylda bír mıllıon sharshy metrden astam tūrǵyn úıdí tapsyrdyq. Sonyń íshínde 710 myń sharshy metrden astamy – ekonom-klass sanatyndaǵy tūrǵyn úı», – deıdí audan basshysy.
Jańa tūrǵyn úı keshenínde 184 bír bólmelí, 248 ekí bólmelí jáne 162 úsh bólmelí páter qarastyrylǵan. Íshkí qūrylys pen árleu jūmysy tolyq bítken. Endí aumaqty abattandyra bastady. Atap aıtqanda, jayau júrgínshíler joly salynyp, tūrǵyndarǵa qolaıly boluy úshín aulany kógaldandyryp jatyr.
Baspasóz tury barysynda jurnalıster qūrylys jūmysynyń ayaq alysymen tanysyp, tūrǵyn úılerdíń daıyndyq deńgeıín kóríp, merdíger ūıym men audan ákímdígí ókílderíne sūraq qoıdy.
«Būl tūrǵyn úı kesheníndegí páterler óte qolaıly. Joba toǵyz qabatty jetí tūrǵyn úıden tūrady. Mūnda barlyq qajettí jaǵdaı jasalǵan. Ár úıde jolaushy men júk lıftísí ornatylǵan. Páterlerdí árlep baryp tapsyrady. Būl tūrǵyndarǵa artyq kúsh jūmsamaı, bírden qonystanuǵa múmkíndík beredí», – dedí «QazQūrylysPodryad» JShS ókílí Dıas Qabdyǵalıev.
Nazıra Toǵyzbaevanyń aıtuynsha, tūrǵyn úı ınfraqūrylymyn damytu Nauryzbaı audanynda basym baǵyttyń bírí bolyp qala bermek. Būl audan qaladaǵy eń jyldam damyp kele jatqan audannyń bírí sanalady. Osyndaı jobalardy íske asyru tūrǵyn úı qoryn ūlǵaıtyp qana qoımaı, qajettí áleumettík jáne ınjenerlík ınfraqūrylymy bar qalalyq keńístíktí qalyptastyruǵa múmkíndík beredí.
«Qazír audanda 176 kóppáterlí tūrǵyn úı salynyp jatyr. Jalpy tūrǵyn úı kólemí – 443 myń sharshy metr. Barlyǵy 6165 páter bar onda. Onyń íshínde bıyl ekonom-klass sanatyndaǵy 64 tūrǵyn úı paıdalanuǵa beríledí. Būl – 208 myń sharshy metr tūrǵyn úı. Sonyń nátıjesínde bıyl 3625 otbasy baspanamen qamtamasyz etíledí», – dep tolyqtyrdy sózín audan ákímí.
Qalqaman-2 shaǵyn audanyndaǵy tūrǵyn úı kesheníníń qūrylysy men abattandyru jūmysynyń ayaqtaluy Almaty tūrǵyndaryn sapaly árí qoljetímdí baspanamen qamtamasyz etu baǵytyndaǵy mańyzdy qadam bolmaq.