26 tamyzda Almatyda Halyk qaıyrymdylyq qorynyń auyl balalaryna arnalǵan AUYL SPORT áleumettík jobasynyń úshínshí mausymy resmı túrde bastaldy. 2024 jyly qolǵa alynǵan bastama bıyl auqymyn keńeıtíp, Qazaqstannyń barlyq 17 oblysyn qamtymaq. Jospar boıynsha óńírlík kezeńderde 15 myńǵa juyq auyl balasy baq synaıdy. Jańa mausymnyń taǵy qandaı erekshelígí bar? Aqshamnews.kz tílshísí jobanyń tanystyrylymyna qatysyp, ūıymdastyrushylar men sport mamandarynan sūrap bíldí.
Bıyl AUYL SPORT-ta bírneshe jańalyq bar. Jarys baǵdarlamasyna alǵash ret futbol engízílíp, sport túrleríníń sany segízge jettí. Būǵan deıín ekí jyl qatarynan Almatyda ūıymdastyrylǵan respublıkalyq turnır endí Astanada ótedí. Sonymen bírge joba bírqatar sport federatsıyalary jáne salalyq ūıymdarmen yntymaqtastyqty kúsheıtpek.
«Auyl balasyna úlken sportqa jol ashqymyz keledí»
AUYL SPORT jobasy Halyk qaıyrymdylyq qorynyń bastamasymen auyldyq jerlerde būqaralyq sportty damytu, balalar men jasóspírímderdíń qabíletín ashu jáne auyl jattyqtyrushylary men tóreshíleríníń kásíbı deńgeıín kóteru maqsatynda 2024 jyly íske qosylǵan.
Alǵashqy mausymda joba alty sport túrínen bastalsa, qazír olardyń sany segízge jetíp otyr. Ekí jyldyń íshínde óńírlík jáne respublıkalyq jarystarǵa 10 myńnan astam auyl balasy qatysqan.
Halyk qaıyrymdylyq qorynyń atqarushy dırektory Ǵalymbek Jaqsylyqovtyń sózínshe, jobanyń negízgí maqsaty – balanyń tūrǵylyqty jerí onyń sporttaǵy múmkíndígín shektemeuíne jaǵdaı jasau.
«Bízdíń maqsatymyz – auylda tūratyn ár balanyń óz qabíletín kórsetuíne múmkíndík beríp, úlken sportqa jol ashu. Alǵashqy ekí mausymda joba 10 myńnan astam balany qamtydy. Bıyl būl kórsetkíshtí 15 myńǵa juyq jas sportshyǵa jetkízudí josparlap otyrmyz. Bíz úshín eń mańyzdy nátıje – AUYL SPORT jeńímpazdarynyń respublıkalyq jarystarmen shektelmeı, halyqaralyq arenalarǵa shyǵyp, Qazaqstan atynan júlde alyp júrgení. Būl auyldaǵy talantqa múmkíndík berílse, onyń álemdík deńgeıge deıín kóteríle alatynyn kórsetedí», – dedí Ǵalymbek Jaqsylyqov.
Bıyl respublıkalyq turnır qaıda ótedí?
Úshínshí mausymnyń basty jańalyqtarynyń bírí – futboldyń jarys baǵdarlamasyna enuí. Osylaısha, bıyl 10-15 jas aralyǵyndaǵy balalar karate, basketbol, voleıbol, boks, erkín kúres, shahmat, ústel tennısí jáne futboldan baq synaıdy.
Ǵalymbek Jaqsylyqov respublıkalyq kezeńníń ótetín orny da ózgeretínín aıtty.
«Bıyl AUYL SPORT-qa segízínshí sport túrí retínde futboldy qosyp otyrmyz. Taǵy bír jańalyq – respublıkalyq turnırdí Astanada ótkízudí josparlap otyrmyz. Aldyńǵy ekí mausymda fınaldyq jarystar Almatyda ótken bolatyn. Endí auyl balalary jarysqa qatysumen qatar, elordamyzdy kóríp, jańa ortaǵa shyǵyp qaıtady. Mūnyń ózí olar úshín úlken tájírıbe dep oılaımyz», – dedí qordyń atqarushy dırektory.
Óńírlík kezeńder 10 qyrkúıekte Jambyl oblysynan bastalyp, 10 qazanǵa deıín elímízdíń barlyq 17 oblysynda arnaıy keste boıynsha ótedí. Jarystarda jalpy 510 medal jıyntyǵy sarapqa salynady.
Óńírlík íríkteu kezeńderín ūıymdastyruǵa 78 388 889 teńge, al respublıkalyq turnırge 15 527 778 teńge qarastyrylǵan.
Ermahan Ibraımov: Álem jáne Olımpıada chempıondarynyń kóbí auyldan shyqqan
Jobanyń jańa mausymynyń ashyluyna Sıdneı Olımpıadasynyń chempıony Ermahan Ibraımov ta qatysty. Olımpıada chempıony auyl balalaryna sportpen kásíbı túrde aınalysuǵa múmkíndík beretín mūndaı jobalardyń mańyzy zor ekenín atap óttí.
Onyń aıtuynsha, Qazaqstan sportynyń tarıhynda auyldan shyǵyp, álemdík dodalarda el namysyn qorǵaǵan sportshylar az emes. Ermahan Ibraımov ózíníń de sporttaǵy joly auyldan bastalǵanyn eske aldy.
«AUYL SPORT jobasynyń ıgílígín bírneshe jyldan berí kóríp kelemíz. Jalpy, Qazaqstannyń talaı álem chempıony men Olımpıada chempıony auyldan shyqqan. Meníń ózím de sonyń bír dálelímín. Auylda talantty, sportqa beıímí bar balalar óte kóp. Olarǵa eń aldymen múmkíndík pen dūrys baǵyt kerek. Osyndaı jobalar sol balalardyń jolyn ashyp, úlken sportqa qadam basuyna kómektesedí. Sondyqtan auyl jastarynyń bolashaǵyna jol kórsetetín AUYL SPORT sekíldí bastamalardyń jyl saıyn jalǵasyp, auqymy keńeıe bergenín qalaımyz», – dedí Ermahan Ibraımov.
Olımpıada chempıonynyń píkírínshe, auyl balasy úshín úlken jarysqa qatysudyń ózí mańyzdy tájírıbe. Jańa orta, myqty qarsylastar men kásíbı jattyqtyrushylardyń nazaryna ílígu jas sportshynyń alǵa ūmtyluyna qosymsha serpín bere alady.
Auyl balalary Antalıyada top jardy
AUYL SPORT bergen múmkíndíktíń naqty mysaldarynyń bírí – Almaty oblysy, Íle audany, Ótegen batyr auylynyń voleıboldan ūldar komandasy.
Komanda jattyqtyrushysy Ǵaınol Ǵalymnyń aıtuynsha, shákírtterí būǵan deıín negízínen oblystyq jarystarda baq synap kelgen. AUYL SPORT olardyń halyqaralyq deńgeıge shyǵuyna múmkíndík bergen.
Ótken jyly auyl komandasy Túrkıyanyń Antalıya qalasyndaǵy jarysqa qatysyp, bírínshí oryn ıelengen.
«Balalarymyz voleıboldan oblys chempıony bolǵanymen, būǵan deıín kóbíne oblys kólemíndegí jarystardan asa almaı júrdík. AUYL SPORT arqyly halyqaralyq turnırge qatysuǵa múmkíndík aldyq. Árıne, alǵash ret mūndaı úlken dodaǵa barǵan balalar úshín ońaı bolǵan joq. Basynda qobalju da, qysym da boldy. Bíraq namysqa tyrysyp, sońyna deıín kúrestík. Nátıjesínde Túrkıya tórínde bírínshí oryn aldyq. Auyl balalaryna osyndaı múmkíndík bergen jobaǵa alǵysymyz zor», – deıdí Ǵaınol Ǵalym.
Jattyqtyrushy úshín Antalıyadaǵy jeńístíń mańyzy tek altyn júldemen ólshenbeıdí. Auyldan shyqqan jas voleıbolshylar alǵash ret halyqaralyq jarystyń atmosferasyn sezíníp, sheteldík qarsylastarmen bír alańda oınap, óz deńgeıín synauǵa múmkíndík alǵan.
AUYL SPORT túlekterí halyqaralyq arenalarda júlde alyp júr
Jobanyń alǵashqy ekí mausymynda kózge túsken sportshylar búgínde halyqaralyq jarystarda da nátıje kórsetíp júr.
2025 jyly Serbıyada ótken Dúnıejúzílík Gımnazıadada AUYL SPORT sportshylary bokstan úsh altyn, erkín kúresten bír qola medal jeńíp aldy. Shahmatshylar ekí Fair Play júldesíne ıe boldy.
Joba túlekterí Qytaı, Túrkıya, Ózbekstan jáne Qyrǵyzstanda ūıymdastyrylǵan jarystarda da Qazaqstan atynan synǵa túsíp, júldelí oryndarǵa ıe bolǵan.
Jarystarǵa qatysatyn balalarǵa qajettí jaǵdaı da joba ayasynda qarastyrylǵan. Sportshylardyń jol júruí men tūruy, sporttyq kıímí jáne qajettí jabdyqtary qamtamasyz etíledí. Būl shalǵaı auylda tūratyn balanyń otbasy úshín qosymsha qarjylyq salmaq túsírmeı, jarysqa qatysuyna múmkíndík beredí.
Federatsıyalarmen bírlesken jūmys kúsheımek
Jańa mausymda AUYL SPORT-tyń kásíbı sport ūıymdarymen baılanysy da keńeıíp otyr.
Joba ayasynda Qazaqstan mektep sporty federatsıyasy, Qazaqstan boks federatsıyasy, ústel tennısí, karate, basketbol jáne voleıbol federatsıyalary, Ūlttyq ǵylymı-praktıkalyq dene tárbıesí ortalyǵy jáne «Arystan» mamandandyrylǵan lıtseıímen yntymaqtastyq turaly memorandumdar jasaldy.
Ūıymdastyrushylar mūndaı áríptestík jarystardy kásíbı deńgeıde ótkízuge ǵana emes, auyldan shyqqan daryndy balalardyń federatsıyalar men sport mamandarynyń nazaryna ílíguíne de yqpal etedí dep otyr.
AUYL SPORT tek balalar arasynda turnır ótkízumen shektelmeıdí. Joba sheńberínde auyl jattyqtyrushylary men tóreshíleríníń kásíbı bílíktílígín arttyruǵa da kóńíl bólínedí.
Būǵan deıín mamandarǵa alǵashqy medıtsınalyq kómek kórsetu, karate jáne erkín kúrestíń jańartylǵan erejelerí boıynsha semınarlar ūıymdastyrylǵan. Al shahmat jattyqtyrushylary halyqaralyq sarapshylarmen tájírıbe almasqan.
Qordyń 10 jyldyǵyna – 10 jańa sport alańy
2026 jyl Halyk qaıyrymdylyq qory úshín de erekshe. Bıyl qordyń qūrylǵanyna 10 jyl tolyp otyr.
Osyǵan oraı AUYL SPORT ayasynda joǵary nátıje kórsetken auyldarda 10 jańa sport alańyn salu josparlanǵan.
Būdan bólek, respublıkalyq jáne halyqaralyq jarystarda erekshe nátıje kórsetken sportshylarǵa bílím granttaryn beru jáne sporttyq sanattar taǵaıyndau máselelerí qarastyrylyp jatyr.
Osylaısha, ūıymdastyrushylar AUYL SPORT-ty jyl saıyn jarys ótkízetín joba retínde ǵana emes, auyl balasyn alǵashqy íríkteuden bastap kásíbı sportqa deıín jeteleıtín júıege aınaldyrudy kózdep otyr.
Kelesí chempıon qaı auyldan shyǵady?
Bıyl AUYL SPORT tarıhyndaǵy eń auqymdy mausym ótpek. Qazaqstannyń barlyq 17 oblysynda ūıymdastyrylatyn óńírlík kezeńderde 15 myńǵa juyq bala baq synaıdy. Olardyń arasynan úzdíkter respublıkalyq turnırge joldama alady.
Jobanyń alǵashqy ekí jyly auyldaǵy sportshyǵa múmkíndík berílse, onyń oblystyq jarystan halyqaralyq arenaǵa deıín jete alatynyn kórsettí. Ótegen batyr auylynyń voleıbolshylarynyń Antalıyadaǵy jeńísí men AUYL SPORT túlekteríníń halyqaralyq dodalardaǵy nátıjelerí – sonyń mysaly.
Al Olımpıada chempıony Ermahan Ibraımov aıtqandaı, Qazaqstannyń talaı álem jáne Olımpıada chempıonynyń joly auyldan bastalǵan. Endeshe, bıyl 15 myńǵa juyq balanyń arasynan úlken sportqa qadam basatyn jańa esímderdíń shyǵuy ábden múmkín.