Astanalyq qutqarýshylar sýburqaqtarda shomylýdyń qanshalyqty qaýipti ekenin eske saldy. Sebebi bul qurylǵylarda sýdy súzgiden ótkizý jáne tazalaý júıeleri qarastyrylmaǵan, - dep habarlaıdy aqshamnews.kz tilshisi Almaty.tv-ǵa silteme jasap.
Qutqarýshylardyń aıtýynsha, sýburqaqtarda mehanıkalyq jaraqat alý qaýpi joǵary, sebebi olardyń beti tegis emes, sý aǵyndary, dekoratıv elementter, sondaı-aq olardyń ishine ornatylǵan qubyrlar men sorǵylar jaraqat tıgizýi múmkin. Sonymen qatar, kóptegen sýburqaq jaryqtandyrý jáne basqa da elektr jabdyqtarymen jabdyqtalǵan, al odan toq soǵýy múmkin.
Sol sebepti barlyq sýburqaqta shomylýǵa tyıym salynǵanyn bildiretin arnaıy belgiler ornatylǵan. Sýburqaq – qalany kóriktendirý elementteri. Olar aýany ylǵaldandyrýǵa jáne estetıkalyq maqsattarǵa arnalǵan.
Bul qurylǵylarda sýdy súzgiden ótkizý jáne tazalaý júıeleri qarastyrylmaǵan.
"Sýburqaqtar qoǵamdyq oryndarda ornalasqandyqtan, olardyń sýy tez lastanady: ishine qoqys, japyraq, shań-tozań, jándikter túsedi. Onda janýarlar men qustar da shomylýy múmkin, al olar túrli ınfeksıalardyń tasymaldaýshysy. Sý – vırýstar men bakterıalar úshin qolaıly orta. Al aýa temperatýrasynyń joǵary bolýy mıkroaǵzalardyń tez kóbeıýine yqpal etedi. Sondyqtan onda shomylýǵa ǵana emes, tipti qoldy nemese jemis-jıdekti jýýǵa da bolmaıdy", – dep eskertti Astana qalasy Sanıtarıalyq-epıdemıologıalyq baqylaý departamenti basshysynyń orynbasary Muhamǵalı Aryspaev.
Zerthanalyq taldaýlardan mundaı sýda entero jáne rotavırýstar, ishek taıaqshalary, salmonellalar men shıgellalar (dızenterıa qozdyrǵyshtary) sıaqty jedel ishek ınfeksıalaryn qozdyratyn patogendi mıkroaǵzalar bolýy múmkin ekeni anyqtalǵan. Ásirese baýyrdy zaqymdaıtyn jáne onyń qyzmetine aýyr nuqsan keltiretin A gepatıti vırýsynan saq bolý kerek.