Almatyda máslıhattyń kezekten tys XL sessıyasy óttí. Onda qala úshín mańyzdy bírqatar másele qaralyp, jyl sońyndaǵy sheshímder qabyldandy, - dep habarlaıdy Aqshamnews.kz.
Atap aıtqanda, deputattar Almaty qalasynyń atmosferalyq auasyn qorǵau erejelerín bekíttí. Būl ereje Qazaqstanda alǵash ret engízílíp otyr jáne megapolıstíń erekshelíkterín eskere otyryp, lastanudyń negízgí kózderín retteudíń bíryńǵaı keshendí tetígín qalyptastyrady. Qūjat aglomeratsıya boıynsha shektí jol beríletín shyǵaryndylardyń jıyntyq tomynyń derekteríne negízdelgen. Oǵan sáıkes, jalpy shyǵaryndy kólemí – 225 myń tonna, onyń 189 myń tonnasy tíkeleı Almatyǵa tıesílí. Onyń íshínde shamamen 112,7 myń tonnasy avtokólíkterden, al shyǵaryndylardyń 84%-ǵa juyǵy ekologıyalyq klasy tómen avtokólíkterden bólínedí.
Bekítílgen Erejeler atmosferaǵa túsetín júktemení kezeń-kezeńímen azaıtudy kózdeıdí. Būl avtoparkterge ekologıyalyq talaptardy engízu, III sanattaǵy nysandarǵa baqylaudy kúsheıtu, tómen shyǵaryndylar aımaqtaryn (LEZ) qūru, sondaı-aq aua sapasyn baqylau men tsıfrlyq esepke alu júıesín damytu arqyly íske asady.
Sonymen qatar, deputattar Almaty qalasyndaǵy jasyl jelekterdí kútu jáne qorǵau erejeleríne ózgeríster engízu jobasyn qarap, qoldady. Jańa ózgeríster jasyl jelekterdí túgendeu jáne kútu tártíbín naqtylap, aǵash kesu men otyrǵyzu jūmystaryndaǵy talaptardy kúsheıtedí, sondaı-aq jer paıdalanu jáne merdíger ūıymdardyń ekologıyalyq talaptardy saqtauyn baqylau mehanızmín keńeıtedí. Aǵash zaqymdau men zańsyz kesuge qatysty jauapkershílík kúsheıtílíp, joıylǵan jasyl jelektíń ornyna jańasyn egu jáne óspeı qalǵan ósímdíkterdí qalpyna keltíru jóníndegí naqty erejeler engízíledí.
Sonymen qatar, deputattar «Almaty qalasynyń jol qozǵalysy qauípsízdígí men kólík qozǵalysyn taldau boıynsha zıyatkerlík júıe» memlekettík-jekemenshík áríptestík jobasy ayasyndaǵy memlekettík míndettemelerdí qabyldau turaly máslıhat sheshímíne ózgeríster engízdí. Sharttyń ūzartyluyna baılanysty qalada qosymsha 350 «Sergek» kamerasy ornatylady. Jol-kólík oqıǵalarynyń kórsetkíshterínde oń dınamıka baıqalady: halyq sanynyń ósuíne qaramastan, 2021-2025 jyldar aralyǵynda jol apattarynan qaıtys bolu deńgeıí orta eseppen 30%-ǵa, al 100 myń adamǵa shaqqandaǵy JKO sany 10%-ǵa azaıǵan.
Sondaı-aq sessıya barysynda 2026 jyldyń 1 qańtarynan bastap kúshíne enetín jańa Salyq kodeksíne baılanysty avtotūraqtar men parkıngterge salynatyn jer salyǵyn retteu máselelerí qaraldy.
Sessıya barysynda Almaty qalasy aumaǵynda syrtqy (vızualdy) jarnamany ornalastyru úshín aı saıynǵy tólem mólsherlemelerí de bekítíldí. Atap aıtqanda, írí formatty jarnama qūrylymdary men jaryqdıodty LED-ekrandar úshín ınfraqūrylym men energoresurstarǵa túsetín qosymsha júktemení óteu maqsatynda joǵary mólsherlemeler belgílendí, al shaǵyn formatty jáne jyljymaly jarnama úshín tómendetílgen tólem qarastyrylǵan, būl shaǵyn jáne orta bıznestí qoldauǵa baǵyttalǵan.
Sessıya sońynda kadrlyq jáne ūıymdastyrushylyq máseleler qaraldy. Ardaq Baıymbetov qalanyń Revızıyalyq komıssıyasynyń tóraǵasy bolyp saılandy. Ol qarjylyq baqylau jáne memlekettík audıt júıesínde eńbek etken, Qarjy mınıstrlígí men Esep komıtetínde basshylyq qyzmetter atqarǵan. 2024 jyldan bastap QR Energetıka mınıstrlígíníń Íshkí audıt departamentín basqarǵan.
Máslıhat sessıyasynda jańadan qūrylǵan saılau uchaskeleríníń uchaskelík saılau komıssıyalarynyń qūramy bekítílíp, komıssıya múshelerí ókílettík merzímí ayaqtalǵansha saılandy. Sondaı-aq, VIII shaqyrylymdaǵy máslıhattyń tūraqty komıssıyalarynyń qūramyna ózgeríster engízílíp, 2026 jylǵa arnalǵan máslıhattyń jūmys jospary maqūldandy.