Jańa mausymnyń alǵashqy premerasy «Alty jasar Alpamys» spektaklí boldy, dep habarlaıdy aqshamnews.kz tílshísí.
Almaty qalasynyń tuǵan kúní ayasynda Memlekettík akademıyalyq quyrshaq teatry 91-mausymnyń shymyldyǵyn salnatatty túrde ashty. Merekelík kesh barysynda teatr ardagerleríne, ūjym qyzmetkerleríne, teatr salasynyń belgílí tūlǵalaryna qūrmet kórsetílíp, mereıtoılyq tósbelgíler tabystaldy. Keshtíń basty jańalyǵy – rejısser Abdolla Qarsaqbaevtyń kórkem fılmí negízínde sahnalanǵan «Alty jasar Alpamys» spektaklíníń premerasy boldy.
Mausymasharǵa teatr salasynyń ardagerlerí, óner qaıratkerlerí, teatrtanushylar, synshylar jáne shyǵarmashylyq-tehnıkalyq ūjym múshelerí qatysty. Quyrshaq jasaushy sheberlerdíń, tígínshílerdíń, suretshílerdíń jáne tehnıkalyq qyzmetkerlerdíń eńbegí de erekshe atalyp óttí.
Kesh barysynda teatr óneríne úles qosqan akterlerge, rejısserlerge, ardagerlerge, teatrtanushylarǵa jáne qyzmetkerlerge mereıtoılyq tósbelgíler tabystaldy. Marapattau rásímíne Qazaqstannyń halyq artısí Tūńǵyshbaı Jamanqūlov, teatr dırektory Almat Amangeldí jáne kórkemdík jetekshí Kubanychbek Adylov qatysty.
Jańa mausymnyń alǵashqy premerasy – «Alty jasar Alpamys» spektaklí rejısser Abdolla Qarsaqbaevtyń áıgílí kórkem fılmí negízínde qoıylǵan. Spektakl mektepke barudy ańsaǵan, bílímge qūshtar Alpamystyń oqıǵasy arqyly ízdenímpazdyq, maqsatshyldyq, meıírímdílík sıyaqty qūndylyqtardy dárípteıdí. Tuyndy eresek kórermenderdí balalyq shaǵyna jetelese, balalarǵa tanys keıípkerdí quyrshaq teatrynyń zamanauı tílímen ūsynady.
91-mausymnyń Premeralar aptalyǵy 16 qyrkúıekte qazaq halyq ertegíleríníń jelísímen sahnalanǵan «Jaqsylyq pen Jamandyq» spektaklímen jalǵasady. 17 qyrkúıekte qorshaǵan ortaǵa qamqorlyqpen qarauǵa úndeıtín «Taza.kz», al 18 qyrkúıekte Almatynyń tarıhy men tabıǵatyn arqau etken «Almatynyń almasy» spektaklderí ūsynylady.