Memleket basshysy Qasym-Jomart Toqaev Qazaqstandaǵy orys, slaván jáne kazak uıymdary qaýymdastyǵynyń tóraǵasy, Parlament Májilisiniń depýtaty Sergeı Ponomarevti qabyldady, dep habarlaıdy, Aqshamnews.kz tilshisi.
Kezdesý barysynda Prezıdentke Qaýymdastyqtyń jalpyulttyq biregeılikti nyǵaıtý, el birligin kúsheıtý jáne jas urpaqty otanshyldyq rýhta tárbıeleý baǵytynda atqarǵan jumystary jóninde aqparat berildi.
Sergeı Ponomarev memlekettik tildi ultty uıystyratyn mańyzdy faktor retinde dáripteýdegi slaván uıymdarynyń qyzmetine toqtaldy. Sondaı-aq ol Qazaqstan halqy Assambleıasyn damytýdyń 2030 jylǵa deıingi «Birligimiz – áralýandyqta» tujyrymdamasyn iske asyrý aıasyndaǵy Qaýymdastyqtyń bıylǵy josparyn tanystyrdy.
Qasym-Jomart Toqaev etnosaralyq kelisim men birlikti saqtaý memlekettik saıasattyń negizgi basymdyqtarynyń biri ekenin atap ótti. Prezıdenttiń aıtýynsha, ádildik pen barshaǵa teń múmkindik jasaý – Ádiletti Qazaqstandy qurýdyń basty qaǵıdattary.
Osyǵan oraı Qazaqstan halqy Assambleıasy men onyń quramyndaǵy uıymdar barlyq etnos ókilderi arasynda qazaqstandyq patrıotızmge negizdelgen ortaq qundylyqtardy keńinen nasıhattaýǵa yqpal etetinin aıtty.