Prezıdent pedagogterdíń qūqyqtyq qorǵaluyn kúsheıtuge jáne bílím beru júıesín jetíldíruge baǵyttalǵan zańǵa qol qoıdy, – dep habarlaıdy aqshamnews.kz tílshísí.
Qabyldanǵan túzetuler Memleket basshysy Qasym-Jomart Toqaevtyń 2025 jylǵy 15 tamyzda ótken Tamyz konferentsıyasynda bergen tapsyrmalaryn oryndau maqsatynda ázírlendí. Ózgeríster pedagogterdíń qūqyqtyq qorǵaluyn kúsheıtuge, olardy kásíbı qyzmetíne qatysy joq míndetterge tartuǵa jol bermeuge, ákímshílík júktemení azaıtuǵa jáne bílím beru salasyndaǵy zańnamany odan árí jetíldíruge baǵyttalǵan.
Jańa normalarǵa sáıkes pedagogterdíń, mektepter men ózge de bílím beru ūıymdary basshylyǵynyń bílím alushylar úshín jauapkershílígí tek kásíbı míndetterín oryndau kezeńímen, yaǵnı bílím beru protsesí uaqytynda ǵana shekteledí. Sonymen qatar balanyń densaulyǵy, ómírí men qauípsízdígí úshín ata-analardyń jauapkershílígí naqtylandy.
Zań pedagogterden bílím beru salasyndaǵy zańnamada kózdelmegen kez kelgen esepter men málímetterdí talap etuge tyıym salady. Būdan bólek, qūjattamany bír mezgílde qaǵaz jáne elektrondyq formatta júrgízu míndetín júktegení úshín ákímshílík jauapkershílík engízíledí.
Túzetulerdíń jeke blogy mektepterde ūyaly baılanys qūrylǵylaryn paıdalanudy retteuge arnalǵan. Oqu-aǵartu mınıstrlígíne orta bílím beru ūıymdaryndaǵy bílím alushylar men tárbıelenushílerdíń ūyaly baılanys qūrylǵylaryn paıdalanu qaǵıdalaryn bekítu ókílettígí beríledí.
Sondaı-aq zıyatkerlík menshíkke qūrmet mádenıetín qalyptastyruǵa jáne bílím sapasyn arttyruǵa baǵyttalǵan akademıyalyq adaldyq ūǵymy engízíledí.
Būdan basqa, ákímdíkterge jalpy bílím beretín pánder boıynsha respublıkalyq olımpıadalar men ǵylymı jobalar konkurstaryna, sondaı-aq respublıkalyq jáne (nemese) halyqaralyq deńgeıdegí sporttyq jarystar men kásíbı sheberlík konkurstaryna qatysatyn óńírlík jeńímpazdardyń qatysuyn qamtamasyz etu míndetí júkteledí. Atalǵan ís-sharalardyń tízbesín Oqu-aǵartu mınıstrlígí aıqyndaıdy.
WorldSkills halyqaralyq kásíbı sheberlík konkurstarynyń jeńímpazdaryna ŪBT tapsyrmaı-aq beıíndík bílím beru baǵdarlamalary boıynsha unıversıtetterge túsu múmkíndígí beríledí.
Sondaı-aq psıhologıyalyq-pedagogıkalyq qoldaudy qajet etetín balalardy qoldau sharalary keńeıtíledí. Zańnyń jekelegen normalary sheteldík joǵary oqu oryndary fılıaldarynyń qyzmetín retteuge jáne medıtsınalyq kadrlardy dayarlau júıesín jetíldíruge baǵyttalǵan.