Memleket basshysy Qasym-Jomart Toqaev qūqyq qorǵau organdarynyń keńeıtílgen alqa májílísínde mínsíz qyzmet atqarǵandarǵa ataq beríletínín aıtty, - dep habarlaıdy aqshamnews.kz tílshísí.
"Qūqyq qorǵau organdarynda úzdíksíz árí mínsíz qyzmet atqarǵandarǵa "qūrmettí qyzmetker" ataǵy beríledí. Alaıda keıbír qūrylymdarda būl joǵary ataq basshylarǵa ǵana būıyrady. Qatardaǵy qarapaıym qyzmetkerler arasynda ūzaq jyldar boıy kásíbı boryshyn adal atqaryp júrgen laıyqty kandıdattar jetkílíktí. Qyzmetkerlerdíń kásíbı deńgeıín arttyryp, moraldyq ruhyn kúsheıtu mańyzdy", - dedí Toqaev.
Sondaı-aq, Prezıdent kóshelerge qyzmet babynda qaza bolǵan qaharmandardyń esímín berudí ūsyndy.
"Osy oraıda, men mekemelík nagradalarǵa qyzmet babynda qaza bolǵan qaharmandardyń esímín beru máselesín qarastyrudy ūsynamyn. Sondaı-aq kósheler men qūqyq qorǵau mekemelerín batyrlardyń atymen atauǵa bolady.
Mūndaı tájírıbe elímízde būrynnan bar. Lańkestí ūstau kezínde erlíkpen qaza tapqan Halyq qaharmany Ǵazız Baıtasovtyń esímí Tarazdaǵy ortalyq kóshelerdíń bíríne beríldí. Sondaı-aq qaladaǵy oqu-jattyǵu polıgony da batyrdyń atymen atalǵan. Tayauda onyń ómírí men erlígí turaly "Kapıtan Baıtasov" atty kórkem fılm kórermen nazaryna ūsynylmaq.
Órt sóndíru kezínde opat bolǵan Asqar Zabıkulın de eldíń esínde. Astanadaǵy Órt sóndíru bólímíne jáne sol bólím ornalasqan kóshege onyń esímí beríldí. Būl azamattardy naǵyz beıbít kúnníń batyrlary deuge bolady. Olar aqtyq demí qalǵansha antqa adal boldy, qyzmettík paryzyn óteu jolynda óz ómírlerín qūrban ettí", - dedí Toqaev.