Búgín Astanada auyl ákímderíníń dıalog-platformasy ótíp jatyr. Jıynda Memleket basshysy Qasym-Jomart Toqaev sóz sóılep, auyldy órkendetu, auyl ákímderí ınstıtutyn odan árí jetíldíru míndetterín aıtty, - dep habarlaıdy aqshamnews.kz tílshísí.
"Qazírgí auyl ákímderíníń 60 paıyzǵa juyǵy osy qyzmetke alǵash ret saılandy. Būl – jergílíktí bılík qūramy bírshama jańardy degen sóz. Alaıda saılauda jeńíske jetu – aldaǵy úlken jūmystyń basy ǵana.
"Ákím boldym, toldym" dep otyruǵa bolmaıtyny túsíníktí. Ákímder ózderíníń myqty basshy ekenín ís júzínde dáleldeuí kerek. "Basshynyń baǵy – el-jūrttyń qamy" dep beker aıtylmaǵan. Naǵyz elge syıly ákím bolu úshín auyldyń ahualyn jaqsy bílu de azdyq etedí. Halyqtyń senímín aqtap, eldíń bereke-bírlígín nyǵaıtu úshín jūmys ísteu kerek.
Ákím memlekettík deńgeıde jasalyp jatqan ózgerísterdí jergílíktí jerde júzege asyruǵa qabílettí boluy qajet. Kásíbı tūrǵydan bílíktí árí eńbekqor ákím saılaushylardyń senímín aqtaı alady. Sondyqtan auyl ákímderíníń basqaru ísíndegí sheberlígín arttyru óte mańyzdy.
Ákímderdíń arasynda būryn bılík júıesínde jūmys ístemegen azamattar bar ekenín aıttyq. Olardyń tájírıbesí az ekení túsíníktí. Osy baǵytta "Amanat" partıyasynyń bastamasymen "Ákímder mektebí" jobasy qolǵa alyndy. Árıne, mūndaı kurstar joǵary bílímníń ornyn basa almaıdy. Sondyqtan unıversıtetterde oqytylatyn "Memlekettík jáne jergílíktí basqaru" baǵdarlamasyn talapqa saı ózgertu kerek.
Auyl-aımaqtardy basqaru, kóshbasshylyq qabílettí damytu máselesí nazardan tys qalǵan. Al būl jūmyspen eń aldymen Memlekettík qyzmet ísterí agenttígí shūǵyldanuy kerek. Qūzyrly mınıstrlíkpen bírlesíp, auyl ákímderín dayarlauǵa belsendí túrde kírísu qajet".