Pavlodar oblysynda áıel adamdy óltíríp, onyń úıín tonamaq bolǵan er adam 10 jylǵa bas bostandyǵynan aıyryldy, dep habarlaıdy Aqshamnews.kz tílshísí.
Pavlodar oblysynda sot áıel adamdy pyshaqtap óltíríp, ózge bír úıdí tonauǵa oqtalǵan er adamǵa qatysty úkím shyǵardy.Sot málímetínshe, qylmys 2025 jyldyń shílde aıynda Pavlodar oblysyndaǵy Zarya auylynda bolǵan. Aldymen aıyptalushy auyl tūrǵynynyń úıíne zańsyz kírgen. Sol túní ol taǵy bír jeke úıdíń aulasyna túsíp, múlík ūrlamaq bolǵan. Alaıda úı ıesí ony baıqap qalǵan. Osy kezde er adam áıelge shabuyl jasap, ony pyshaqtap óltírgen.
Qylmystyń ízín jasyru úshín kúdíktí úı íshíndegí zattardy órtep, oqıǵa ornynan qashyp ketken.
Sotta prokuror aıyptalushyǵa 9 jyl bas bostandyǵynan aıyru jazasyn sūraǵan. Al kúdíktí men onyń qorǵaushysy tūrǵyn úıge zańsyz kíru deregí boıynsha aqtaudy, al kísí óltíru babymen eń tómengí jaza taǵaıyndaudy ótíngen. Jábírlenushí tarap naqty merzímge sottaudy talap ettí.
Sot er adamnyń kínásí tolyq dáleldengenín atap óttí. Būl jábírlenushíler men kuágerlerdíń kórsetulerí, saraptama qorytyndylary jáne sottalushynyń óz kínásín moıyndauymen rastalǵan.
Sot aıyptalushynyń būryn sottalmaǵanyn, kínásín moıyndap, ókínísh bíldírgenín jeńíldetetín mán-jaılar retínde esepke aldy. Auyrlatatyn jaǵdaılar anyqtalmaǵan.
Qylmystardyń jıyntyǵy boıynsha er adam 10 jylǵa bas bostandyǵynan aıyryldy. Úkím zańdy kúshíne álí engen joq.
