Almaty qalasyndaǵy Armıya úıínde «Patrıotızm jáne Otanǵa degen súıíspenshílík – árbír komandırdíń míndetí» taqyrybynda III respublıkalyq forum óttí, – dep habarlaıdy aqshamnews.kz tílshísí.
Sarbaz analarynyń «Analar júregí» komıtetí ūıymdastyrǵan ís-sharaǵa kúshtík qūrylymdar men áskerı vedomstvolardyń, qoǵamdyq ūıymdar men būqaralyq aqparat qūraldarynyń ókílderí qatysty.
Forumnyń ashyluy 28 gvardıyashy-panfılovshylar sayabaǵyndaǵy Máńgílík alauǵa gúl shoqtaryn qoyu rásímínen bastalyp, qatysushylar qaza tapqan batyrlardy bír mınut únsízdíkpen eske aldy.
Qoǵamdyq dıalogqa qatysqan Qazaqstan Respublıkasy Qorǵanys mınıstríníń tárbıe jáne ıdeologıyalyq jūmystar jóníndegí orynbasary general-maıor Asqar Mūstabekov mūndaı kezdesuler memlekettík organdar men qoǵamdyq ūıymdar arasyndaǵy tájírıbe almasuǵa, ózara ís-qımyldyń jańa tetíkterín qalyptastyruǵa jáne áskerı-patrıottyq tárbıení odan árí damytuǵa yqpal etetínín atap óttí.
Ís-sharaǵa Qazaqstan Respublıkasy Ūlttyq ūlanynyń «Ońtústík» óńírlík qolbasshylyǵynyń qolbasshysy general-maıor Sákentaı Shekarbekov qatysyp, mūndaı kezdesulerdíń áskerı bólímder men ata-analar arasyndaǵy ózara senímdí nyǵaıtudaǵy, áskerı qyzmettíń bedelín arttyrudaǵy jáne jastardy patrıottyq ruhta tárbıeleudegí mańyzyn atap óttí.
Sondaı-aq óńírlík qolbasshylyq qolbasshysy Ūlttyq ūlanda áskerı qyzmetshíler úshín qolaıly jaǵdaı jasau baǵytynda atqarylyp jatqan jūmystarǵa toqtaldy. Onyń aıtuynsha, Qazaqstan Respublıkasy Íshkí íster mınıstríníń orynbasary – Ūlttyq ūlannyń Bas qolbasshysy general-leıtenant Ansaǵan Baltabekovtíń bastamasymen Almaty jáne Túrkístan qalalarynda áskerı qalashyqtardyń qūrylysy bastalyp, Almatydaǵy 5571 áskerı bólímí men Qyzylordadaǵy 5547 áskerı bólímíníń batalondaryna arnalǵan jańa kazarmalardyń qūrylysy ayaqtaluǵa jaqyn.
Forum barysynda sarbazdarǵa qamqorlyq jasap, jeke qūram arasyndaǵy qolaıly moraldyq-psıhologıyalyq ahualdy qalyptastyruǵa qosqan úlesí úshín úzdík ofıtserler marapattaldy. Ūlttyq ūlannan 5571 áskerı bólímí rota komandıríníń orynbasary aǵa leıtenant Myrzaádíl Qanatūly, 3660 áskerı bólímíníń atqyshtar rotasynyń komandırí aǵa leıtenant Samǵar Kópjasar jáne 5514 áskerı bólímí komandıríníń tárbıe jáne áleumettík-qūqyqtyq jūmystar jóníndegí orynbasary podpolkovnık Nūrsūltan Tólegen Alǵys hattarǵa ıe boldy.
Sondaı-aq forum ayasynda Ūlttyq ūlannyń 5571 áskerı bólímíníń sarbazy qatardaǵy jauynger Ansar Saǵıbekov, 3660 áskerı bólímíníń sarbazy qatardaǵy jauynger Erbosyn Nūrmūhambet jáne 5514 áskerı bólímíníń sarbazy qatardaǵy jauynger Madıyar Dosbolūly óz analarymen sahna tórínde qauyshyp, 10 kúndík demalysqa joldama aldy. Sarbazdar úshín būl erekshe tosyn syı boldy.