6 mamyrda Májílís deputattary Senat engízgen túzetulermen "Januarlarǵa jauapkershílíkpen qarau turaly" zań jobasyn maqūldady, – dep habarlaıdy aqshamnews.kz tílshísí.
Qūjat Parlamentte tolyq qabyldanyp, Prezıdenttíń qol qoyuyna joldandy.
Deputat Erbolat Satybaldynyń aıtuynsha, Senat engízgen ózgeríster audandyq (oblystyq mańyzy bar qalalar) ákímdíkteríníń januarlardy ūstau qaǵıdalaryn jáne januarlardy ūstau oryndarynyń sanıtarlyq aımaqtarynyń shekarasyn belgíleu jóníndegí ūsynystaryn oblystyq atqarushy organdarǵa engízu qūzyretín alyp tastauǵa baǵyttalǵan.
Sonymen qatar, zańda "qańǵybas januarlar" ūǵymy naqtylanyp, januardyń sáıkestendíru qūralynyń (chıptíń) bolmauy emes, ıesíníń bolmauy negízgí krıterıı retínde engízíldí.
Sondaı-aq veterınar dárígerdíń qorytyndysy negízínde januardyń densaulyǵy men ómír súru sapasy aıtarlyqtaı nasharlaǵan jaǵdaıda evtanazıya jasau múmkíndígín qarastyratyn norma tolyqtyryldy, dedí deputat.
Sondaı-aq máslıhattarǵa qańǵybas januarlar sanyn retteu tártíbí men merzímín belgíleu ókílettígín beru ūsynylyp otyr (mysyqtardan basqa).
"Ekologıya jáne tabıǵatty paıdalanu máselelerí jóníndegí komıtet Qazaqstan Respublıkasy Parlamentí Senaty engízgen "Qazaqstan Respublıkasynyń keıbír zańnamalyq aktíleríne januarlarǵa jauapkershílíkpen qarau máselelerí boıynsha ózgeríster men tolyqtyrular engízu turaly" zańǵa engízílgen túzetulermen kelísudí ūsynady", – dep túıíndedí májílísmen.
2026 jylǵy 25 sáuírde būl zańǵa Qazaqstan Prezıdentí Qasym-Jomart Toqaev ta píkír bíldírgen bolatyn. Memleket basshysy januarlardy qorǵau tásílderín kúsheıtu jáne adamdardyń olardyń taǵdyry úshín jauapkershílígín arttyru qajet ekenín atap óttí.