Italıya parlamentíníń tómengí palatasy seısenbí kúní áıelderdí olardyń jynysyna baılanysty óltírgení úshín jazany qatańdatatyn zań jobasyn qabyldady, - dep habarlaıdy Aqshamnews.kz.
Būl turaly tómengí palatanyń resmı saıty habarlady.
Jazany kúsheıtetín zań jobasy shílde aıynda Senatta maqūldanǵan bolatyn. Zań jobasy qylmystyq kodekske "femınıtsıd" degen jańa bapty engízedí. Zań boıynsha, áıeldí jynysyna baılanysty jek kórínísh, kemsítu, bılíktí asyra paıdalanu, baqylau, erkíndígín shekteu nemese emotsıonaldyq qarym-qatynastan bas tartqany úshín óltírgender ómír boıyna bas bostandyǵynan aıyryluy múmkín. Qazírgí ıtalyan zańnamasynda femınıtsıdke jatatyn qylmystar úshín auyrlatatyn jaza qarastyrylǵanymen, ony jeke bap retínde bólmegen.
Post basylymynyń jazuynsha, zań jobasy bír auyzdan maqūldanyp, barlyq 237 deputat qoldady. Zań jobasyn qarau 25 qarashada atalyp ótetín Áıelderge qarsy zorlyq-zombylyqqa qarsy halyqaralyq kúnge sáıkes keldí. Prezıdent qol qoıǵannan keıín qūjat kúshíne enedí.
Italıyanyń Ūlttyq statıstıka ınstıtuty Istat málímetínshe, 2024 jyly elde 116 áıel óltírílgen, olardyń 106-sy jynysyna baılanysty qylmys retínde qarastyryluy múmkín. Olardyń íshínde 62 áıel qazírgí nemese būrynǵy seríktesterí tarapynan óltírílgen.
