Pantone ınstıtuty 2026 jyldyń basty túsín jarıyalady. Ol - Cloud Dancer (11-4201), yaǵnı beıtarap aq reńk. Instıtut ókílderíníń aıtuynsha, "Cloud Dancer bízdí ádetten tys oılauǵa, jańa múmkíndíkterge ashyq boluǵa úndeıdí". Al būl tańdau rasymen ómírímízge áser ete me? Mūnyń mánín Aqshamnews.kz tílshísí anyqtap kórdí.
Pantone degen ne?
Pantone - AQSh-ta qūrylǵan, túster júıesín ázírleumen jáne standarttaumen aınalysatyn írí kompanıya. Ol dızaınerlerge, baspa ísí men brendterge arnalǵan túster palıtrasyn jasap, naryqtaǵy trendterdí taldaıdy jáne boljaıdy.
Kompanıya 1950-jyldary Nyu-Iorkte qūrylǵan. Al 1960-jyldary Pantone álemdegí barlyq tústerdí bírízdendírgen Pantone Matching System (PMS) júıesín oılap tapty. Būl júıede ár túske atau men nómír berílgen. Sonyń arqasynda dızaıner men tapsyrys berushí bír-bírín dál túsíne alady.
Búgínde Pantone júıesí ınterer dızaınynda, sán ındustrıyasynda, polıgrafıyada keńínen qoldanylady. Típtí Kanada men Ońtústík Koreya sekíldí elder memlekettík rámízderdíń tústerín tańdauda Pantone kestesíne súıenedí.
"Jyl túsí" degen ne?
Pantone qūramyndaǵy Pantone Color Institute - tústíń adam emotsıyasyna, qoǵamǵa jáne tūtynushylyq sūranysqa áserín zertteıtín ınstıtut. 2000 jyldan berí ınstıtut jyl saıyn belgílí bír tústí "jyldyń basty túsí" dep jarıyalap keledí.
Būl - oıdan shyǵarylǵan jańa tús emes, Pantone katalogynda būrynnan bar reńk. Instıtut sarapshylarynyń píkírínshe, būl tús kıno, sán, dızaın, tehnologıya sekíldí salalarda aldaǵy jyly erekshe sūranysqa ıe bolady.
2026 jyldyń basty túsí - Cloud Dancer 11-4201, beıtarap aq reńk.
Pantone ınstıtutynyń sıpattamasyna sáıkes, būl tús:
- tynyshtyq pen aıqyndyqty bíldíredí;
- vızualdy tazalyq pen keńístík sezímín tudyrady;
- funktsıonaldylyq pen emotsıyany úılestíredí;
- bolashaqqa ashyqtyqty, jańa bastamany sıpattaıdy.
Instıtut ókílderí Cloud Dancer-dí "taza paraqpen" salystyrady: bolashaq ár adamǵa tıesílí ekenín eske salatyn tús.
Jyl túsín qalaı tańdaıdy?
Pantone-da būl úshín naqty formula joq. Instıtut dırektory Leatrıs Aızmannyń aıtuynsha, bárí - taldau men baqylauǵa negízdelgen.
Sarapshylar:
- sán aptalyqtaryn (ásírese Mılan, Parıj, London);
- kórmeler men art-jobalardy;
- kınofılmderdegí vızualdy palıtrany;
- avtokólík ındustrıyasyndaǵy tústerdí;
- megapolıs tūrǵyndarynyń kıím tańdauyn baqylaıdy.
Aızmannyń sózínshe, avtokólík óndírushíler túster trendínde bárínen alda: "Jańa kólíktíń túsín kórgen adam dál sondaı reńktegí ayaqkıím, erín dalaby nemese ınterer boyauyn qalaıdy".
Jylyna ekí ret Pantone ınstıtutynyń ókílderí qūpıya jerde jınalyp, taldau júrgízedí. Al jeltoqsan aıynda kelesí jyldyń basty túsí resmı túrde jarıyalanady.
Būl shynymen áser ete me?
Mańyzdysy - Pantone trendtí oılap tappaıdy, tek bar tendentsıyany bekítedí. Yaǵnı tús Pantone arqasynda emes, ózí tanymal bolǵany úshín "jyl túsí" atanady.
Degenmen resmı mártebe alǵan soń, būl tús odan árí keń taralady. Pantone jyl saıyn «jyl túsíndegí» suvenırler men gadjetter shyǵarady. Sonymen qatar kosmetıka jáne sán brendterímen bírlesken kollektsıyalar ūsynady.
Mysaly:
Sephora bírneshe jyl qatarynan Pantone-pen kollaboratsıya jasaǵan;
2018 jylǵy Ultra Violet túsíne Butter London arnaıy lak pen tenı shyǵarǵan;
Loewe, JCPenney, Room Copenhagen úıge arnalǵan būıymdar ūsynǵan.
Al írí sán úılerí kóbíne kerísínshe Pantone-ǵa áser etedí.
Pantone nūsqasy boıynsha jyl tústerí (2000–2026)
2026 - Cloud Dancer, 2025 - Mocha Mousse, 2024 - Peach Fuzz, 2023 - Viva Magenta, 2022 - Very Peri, 2021 - Ultimate Grey & Illuminating, 2020 - Classic Blue, 2019 - Living Coral, 2018 - Ultra Violet, 2017 - Greenery, 2016 - Rose Quartz & Serenity, 2015 - Marsala, 2014 - Radiant Orchid, 2013 - Emeral, 2012 - Tangerine Tango, 2011 - Honeysuckle, 2010 - Turquoise, 2009 - Mimosa, 2008 -Blue Iris, 2007 - Chili Pepper, 2006 - Sand Dollar, 2005 - Blue Turquoise, 2004 - Tigerlily, 2003 - Aqua Sky, 2002 - True Red, 2001 - Fuchsia Rose, 2000 - Cerulean
Pantone "jyldyń túsín" kezdeısoq tańdamaıdy. Būl - qoǵamda, mádenıette jáne naryqta písíp-jetílgen trend. Al Pantone ony resmı túrde bekítíp, áserín kúsheıtedí. Nátıjesínde tús trendke aınalyp, ómírímízdíń ár salasyna eníp ketedí.