Elímízde resmı tírkeusíz ózín ózí jūmyspen qamtyǵan azamattardyń sany 170 myńnan asty. Būl – jyl basymen salystyrǵanda 10%-ke kóp kórsetkísh. Sarapshylardyń aıtuynsha, mūndaı azamattar nátıjesíz jūmyspen qamtylǵandar qataryna jatady jáne olardyń ekonomıkaǵa paıdasy mardymsyz dep habarlaıdy Aqshamnews.kz
Jyldyń ekínshí toqsanynda ózín ózí jūmyspen qamtyǵan, bíraq resmı tírkeuí joq azamattar sany aıtarlyqtaı artty. Olardyń 70%-í – esh jerde tírkelmegen, óz betínshe tabys tabatyn azamattar. Qalǵan 24%-í – jeke qosalqy sharuashylyqta kúnkórís deńgeıínen tómen tabys tabatyn jūmysshylar. Ūlttyq bank sarapshylarynyń aıtuynsha, būl azamattardyń ekonomıkadaǵy úlesí tómen, árí salyqtyq bazaǵa qosylmaıdy. Sáuír-mausym aralyǵynda mūndaı jūmysshylardyń jūmys kúshíndegí úlesí 1,7%-tí qūrady.
Resmı statıstıka boıynsha Qazaqstanda 9,3 mıllıon adam eńbekke tartylǵan. Onyń 76%-í – jaldamaly jūmysshylar (shamamen 7 mln adam), al 2 mln-nan astamy – ózín ózí jūmyspen qamtyǵandar. Jūmyssyzdyq deńgeıí qatarynan tórt toqsan boıy 4,6% deńgeıínde qalyp otyr. Alaıda Májílís deputattary būl kórsetkíshtíń shynaıylyǵyna kúmán keltírude.
Deputat Nartaı Sársenǵalıev Úkímetke saual joldap, jūmyssyzdyqty esepteu ádísnamasyn qaıta qarau qajettígín aıtty. Onyń aıtuynsha, 5 mıllıonnan astam qazaqstandyqtyń zeınetaqy qorynda qarajat joq jáne áleumettík audarymdar jasalmaǵan. Būl – olardyń shyn mánínde jūmyssyz ekenín bíldíruí múmkín.
Úkímet halyqaralyq eńbek ūıymynyń ūsynymdary negízínde jańa ádísnama daıyndaıtynyn rastady. Sebebí qazírgí esep boıynsha nátıjesíz jūmyspen qamtylǵandar, uaqytsha jūmysshylar men belsendílígí tómen azamattar jūmyssyzdar qataryna kírmeıdí. Eger osy toptar qosylsa, jūmyssyzdyq deńgeıí 8,3%-ten asuy múmkín.
Ūlttyq statıstıka byurosy ekínshí toqsanda jūmyssyzdar sany 2,7 myń adamǵa qysqarǵanyn habarlady. Qazírgí tańda elde shamamen 450 myń jūmyssyz tírkelgen. Eńbekke jaramdy azamattardyń basym bólígí sauda, bílím beru, ónerkásíp jáne auyl sharuashylyǵy salasynda eńbek etude. 15 jastan asqan jūmysshylar jalpy eńbek naryǵynyń 64%-ín qamtıdy.
Sonymen qatar tehnıkalyq jáne jūmysshy mamandyqtar boıynsha kadr tapshylyǵy álí kúnge deıín ózektí másele bolyp qalyp otyr. Prezıdenttíń bastamasymen qolǵa alynǵan «Jūmysshy mamandyqtar jyly» osy saladaǵy problemalardy sheshuge baǵyttalǵan.
Qazaqstanda resmı tírkelmegen, nátıjesíz jūmyspen qamtylǵan azamattardyń sany ósíp keledí. Būl eńbek naryǵynyń shynaıy kórínísín būrmalauy múmkín. Jūmyssyzdyqty naqty baǵalau úshín Úkímet ádísnamalyq ózgeríster engízbek. Būl ózgeríster eldegí áleumettík-ekonomıkalyq sayasattyń tıímdílígín arttyruǵa múmkíndík beredí.