Ónim onkologıalyq aýrýlardyń da aldyn alýda tıimdi
Álemdi indet jaılaǵan kezeńde organızmdi vırýstan qalaı qorǵap, sozylmaly aýrýlar mazalamas úshin ımýnıtetti qalaı kóterýge bolady? Sońǵy ýaqytta árbir qazaqstandyqty osy suraq mazalap júrgeni anyq. Otandyq ǵalymdar aǵzany vırýstan qorǵaıtyn ónim oılap tapty, dep habarlaıdy Almaty-akshamy.kz Baq.kz agenttigine silteme jasap.
National Laboratory Astana (NLA) Nazarbayev University zerthanasynyń mamandary aǵzany árlendiretin NÁR dep atalatyn sınbıotıkti jasap shyǵardy.
Sınbıotıkalyq sýsynnyń sozylmaly aýrýǵa shaldyqqan adamdarǵa em-domdyq yqpaly klınıkalyq turǵyda dáleldengen. Sondaı-aq ol qant dıabeti, metabolızmdik sındrom, arterıalyq gıpertenzıa men artyq salmaǵy bar adamdardyń densaýlyǵyn jaqsartady dep otyr mamandar.
Ónim quramyna biregeı probıotıkalyq ashytqy, pektın, ınýlın men antıbıotıkpen emdelgen soń jáne jáne sozylmaly aýrýlardy emdegende organızmdi qalpyna keltiretin balyq kollageni kiredi. Jyldam sińetin mıkroelementter men dárýmenderden turatyn sýsyn ishki faktorlar men qorshaǵan ortanyń jaǵymsyz áserinen jasýshalardy qorǵaıdy.
«Ósimdik talshyqtary men Japonıada óndirilgen balyq kollageniniń arqasynda sýsyn ómirlik qajetti amınqyshqyldary men mıneraldyń qorlaryn toltyra alady. Jalpy, ónim uzaq ómir súrýge sebep bolady jáne onkologıalyq aýrýlardyń aldyn alýda tıimdi. Qazaqstandyq ǵalymdar ázirlegen formýla ımýnıtetti nyǵaıtyp, holesterın deńgeıin tómendetetin sýsyn alýǵa múmkindik beredi. Sýsyn ishektiń mıkrobtyq balansy buzylǵanda paıdaly. Ony kez kelgen jastaǵylarǵa qoldanýǵa bolady», - deıdi ázirleýshi ǵalymdar.
Otandyq sýsyndy jasap shyǵarǵanda ǵalymdar keshendi probıotıkalyq, sondaı-aq antıoksıdantty qasıetterge ıe qymyz, shubat, aıran sekildi ulttyq sýsyndardyń mıkroorganızmderiniń biregeı shtamdaryn qoldanypty. Ónim antıngentoksıkalyq qasıetiniń arqasynda kolorektaldy obyrdyń aldyn alýǵa jáne qart adamdardaǵy metabolızmdik sındrom men kardıovaskýlárlyq aýrýlardy emdeýge baǵyttalǵan kórinedi.