Almatyda bes mektep Halyqaralyq bakalavrıat (IB) baǵdarlamasyn engízu boıynsha pılottyq alań retínde belgílendí. Būl turaly qalalyq bílím basqarmasy málímdedí, – dep habarlaıdy aqshamnews.kz tílshísí.
Joba ayasynda №201 mektep negízgí mektepke arnalǵan Middle Years Programme (MYP) baǵdarlamasy boıynsha Halyqaralyq bakalavrıat sarapshylarynyń verıfıkatsıyalyq saparynan óttí. Sapar 7–8 sáuír aralyǵynda onlaın formatta ótíp, halyqaralyq bílím beru standarttaryn engízudegí júıelí jūmystyń nátıjesí boldy. Kelesí aptada №159 gımnazıyada da osy baǵdarlama ayasynda ūqsas verıfıkatsıyalyq sapar ótedí.
Baǵalau barysynda mektep ákímshílígímen, pedagogtarmen, oqushylarmen jáne ata-analarmen sūhbat júrgízíldí. Sarapshylar MYP baǵdarlamasynyń oqu protsesíne engízíluín, pánaralyq tásíldíń qoldanyluyn, sondaı-aq oqushylardyń synı oılauy men zertteu daǵdylarynyń damuyn joǵary baǵalady.
Bílím basqarmasy pılottyq jobaǵa sonymen qatar №4 mektep-ınternat, №27 jáne №105 mektepterdíń de kírgenín atap óttí.
«Búgíngí tańda bízdíń bes mektebímíz Halyqaralyq bakalavrıatty engízu boıynsha pılottyq alań bolyp belgílendí. Bízdíń míndetímíz — halyqaralyq bílím beru standarttary qalanyń memlekettík mektepterínde qoljetímdí bolatyn júıe qalyptastyru», — dedí basqarma ókílderí.
Kelesí kezeń — Halyqaralyq bakalavrıattyń avtorızatsıyalanǵan mektebí mártebesín alu.
Halyqaralyq bakalavrıat (IB) — būl synı oılaudy, zertteu daǵdylaryn jáne jahandyq dúnıetanymdy damytuǵa baǵyttalǵan bílím beru baǵdarlamasy. Būl baǵdarlama álemníń 150-den astam elínde íske asyryluda.