Qūrmanǵazy atyndaǵy Qazaq ūlttyq halyq aspaptar orkestrí sahnasynda "Mahabbat – máńgí ertegí" atty áserlí kontsert óttí. Bíregeı muzykalyq joba ūlttyq ǵashyqtar kúní sanalatyn Qozy Kórpesh – Bayan sūlu kúní merekesíne oraı ūıymdastyryldy, – dep habarlaıdy aqshamnews.kz tílshísí.
Kesh kórermendí názík sezímder álemíne jetelep, mahabbattyń máńgílík taqyrybyn ásem áuenmen órnektedí. Kontsert baǵdarlamasynda ūlttyq orkestrdíń súıemeldeuímen eń tańdauly lırıkalyq shyǵarmalar men júrekke jyly áser etetín syrly tuyndylar oryndalyp, zalǵa erekshe atmosfera syılady. Muzyka men sóz úılesímí tyńdarmandy tereń tolǵanysqa bólep, árbír áuen mahabbattyń san qyryn sezíndírdí.
"Ǵashyqtar kúníne arnalǵan kontserttí ótkízu jyl saıyn dástúrge aınalyp keledí. Búgíngí keshtegí shyǵarmalardyń ózí adamzatqa ortaq súıíspenshílík sezímín jetkízedí. Ūlttyq orkestrmen bírge Qazaqstan estradasynyń jaryq jūldyzdary – Erkesh Hasen, Abık Jeksen jáne Arujan Danyshpan óner kórsettí. Óner ıeleríníń oryndauyndaǵy áserlí ánder keshtíń kórkemdík mazmūnyn baıyta tústí", – dedí orkestr dırektory Medet Quanyshev.
Ūlttyq orkestrdíń bas dırıjerí – "Qūrmet" ordeníníń ıegerí Abylaı Tílepbergen. Sondaı-aq Qazaqstannyń eńbek síńírgen qaıratkerí Jeksen Aısyn jáne respublıkalyq baıqaulardyń laureaty Naryn Qajyǵalı dırıjerlík sheberlíkterín tanytyp, keshtíń muzykalyq deńgeıín bıíktete tústí.
"Būl mereke bekítílgelí berí qazaqtyń ūlttyq orkestrí nege osyndaı mańyzdy kúndí kontsert arqyly kórermenge ūsynbasqa degen oı tuyndady. Baǵdarlamada qazaqtyń kúılerí men ánderínen bólek, sheteldík tuyndylar da oryndaldy. Būl – kórermenge jańa áser syılaudyń bír joly", – dedí bas dırıjer Abylaı Tílepbergen.
"Mahabbat – máńgí ertegí" kontsertí kórermenge erekshe kóńíl kúı syılap qana qoımaı, muzyka men sezím úndestígín tereńnen pash etken mazmūndy ruhanı keshke aınaldy. Osyndaı jobalar ūlttyq ónerdíń jańa tynysyn ashyp, kórermen men sahna arasyndaǵy baılanysty odan árí nyǵaıta túsetíní sózsíz.
Dana SADYRQAN