Jaqynda aqpannyń basynda Dubaıda UAE SWAT Challenge-2026 halyqaralyq jarysy óttí. El namysyn bes komanda qorǵap, Qazaqstannyń arnaıy jasaq sarbazdary álemdík arenada joǵary nátıje kórsettí. Aqshamnews.kz tílshísí jarysta jeńístí jaqyndatuǵa úles qosqan jandardyń bírí - Janǵalı Erdáuletpen sūhbattasty.
Sportshylar úshín ózderíníń sheberlígín kórsetetín doda - Olımpıada bolsa, kıno maıtalmandary «Oskar» úshín janyn salady. UAE SWAT Challenge de jarys áskerıler men arnaıy jasaq úshín jauyngerlík ruh pen tártíptí kórsetetín bedeldí turnır bolyp sanalady.
Erdáulettíń sózínshe, būl jarysqa daıyndyqty olar ótken jyldyń qazan aıynda bastaǵan. Al Dubaıdyń ózínde baıraqty báseke aldynda ekí aı boıy aua raıyna beıímdelíp, jarysqa daıyndyqty jetíldíre túsken. Salqyn jerden ystyq jerge baryp jersínu sıyaqty qıyndyqtarǵa qaramastan, erjúrek sarbazdar el namysyn abyroımen qorǵap, halyqaralyq deńgeıde Qazaqstannyń bedelín arttyrdy.
Erdáulet Janǵalı - «Pulya» nemese «Oqtaı jyldamdyq»: jyldamdyq pen mergendíktíń sımvoly
Keıípkerímíz - Janǵalı Erdáulettí ózí syndy áríptesterí osy jarys barysynda «Pulya» dep atap ketken. Oǵan sebep - jarys kezínde ózíníń jyldamdyǵy men mergendík sheberlígín tolyq kórsetuí. Ol belgílengen qashyqtyqta júgíríp baryp nysanalardy dál kózdep atyp, qaıta márege oralu míndetín mínsíz oryndady. Kazakhstan D komandasynyń sapynda óner kórsetken oǵan būl saıys ońaıǵa soqpaǵan. Sebebí, jarystyń alǵashqy kúnínde ayaǵyn qaıyryp alǵan. Soǵan qaramastan, jarystyń qalǵan tórt kúnínde boıy el namysyn qorǵap, komandalyq úılesímdílík pen jeke sheberlíktí tolyq kórsettí.
«Būryn mení áríptesterím «Jalyn» deıtín. Al jarysqa daıyndyq barysynda jyldamdyǵymmen erekshelengendíkten, «Pulya» degen laqap at aldym», – deıdí Erdáulet. Onyń jyldamdyǵy zulaǵan oqqa teń, al mergendík sheberlígí el namysyn qorǵauǵa úlken úles qosty.
Erdáulettíń jarystaǵy negízgí míndetí – belgílengen qashyqtyqta júgíríp baryp, nysanany kózdep atu, qaıta márege oralu jáne qarudy dál qoldanu. Būl synaqtar tek jyldamdyqty ǵana emes, sonymen qatar taktıkalyq oılaudy, nazar men shapshańdyqty talap etedí.
Daıyndyq, taktıka jáne komandalyq jeńíster
Erdáulet Janǵalı Soltústík Qazaqstan oblysy, Jambyl audany, Aıtuar auylynyń tumasy. 23 jastaǵy Janǵalı Erdáulet qazír Qaraǵandy qalasyndaǵy 5451 áskerı bólímínde qyzmet etedí. Áskerı shení - kapıtan.
Áskerı salany bala kezínen armandap, túbegeılí sheshím qabyldap osy salaǵa bet būrǵan. Petropavl qalasyndaǵy Ūlttyq ūlan akademıyasyn úzdík támamdaǵan, arnaıy jasaqqa qabyldanu úshín fızıkalyq jáne bílímdík talaptardy oryndaǵan. Būl jolda tabandylyq, namys pen tártíp mańyzdy ról atqardy.
Eske salaıyq, Dubaıda ótken UAE SWAT Challenge-2026 halyqaralyq jarysyna Qazaqstannan bes komanda qatysty: «Kazakhstan A», «B», «C», «D» jáne áıelder komandasy «Tomiris». Qorytyndy kestede:
Kazakhstan C – absolyuttí chempıon (barlyq jarys kúnderínde úzdík nátıje)
Kazakhstan A – 2 oryn
Kazakhstan B – 8 oryn
Kazakhstan Tomiris – 18 oryn
Kazakhstan D – 20 oryn
Jarystyń Obstacle Course kezeńínde, sondaı-aq 100 jáne 300 metrlík nysanalardy kózdep atudan Erdáulet pen onyń komandalastary erekshe nátıje kórsettí. Komandalyq úılesímdílík, jyldamdyq pen qyraǵylyq Qazaqstan komandalarynyń jeńísínde sheshushí faktor boldy.
El namysyn oıdaǵydaı qorǵap kelgen jeńímpazdar elge kelísímen Prezıdent Qasym-Jomart Toqaevtyń qabyldauynda boldy.
Memleket basshysynyń qolynan marapat alǵandar qatarynda Erdáulet Janǵalı de bar. El maqtanyshyna aınalǵan būl jetístígí úshín ol «Jauyngerlík erlígí úshín» medalímen marapattaldy.
«Mūndaı jarysqa ár memleket ózíníń eń myqty sarbazdaryn jíberedí. Soǵan qaramastan el úmítín aqtap, úzdíkterdíń úzdígí atanu ońaı emes ekení anyq. Būl kezdeısoq jetístík emes. Ár jetístík – zor erík-jíger men qajyrly eńbektíń jemísí. Ár jeńís – myqty kásíbı daıyndyq pen asqan sheberlíktíń aıqyn kórínísí. Ózderíńíz bílesízder, byltyr osy bedeldí jarysta Qazaqstan qūramasy ekí kúmís júldení enshíledí. Bıyl da sol jeńís jolyn jalǵastyryp, zor sením artqan ūlttyq komandamyz abyroımen oraldy, - degen edí Prezıdent jarystan oljaly oralǵan jeńímpazdardy qūttyqtau sátínde
UAE SWAT Challenge-2026 halyqaralyq jarysyndaǵy tabys - Qazaqstannyń arnaıy bólímsheleríníń joǵary jauyngerlík daǵdylary, fızıkalyq daıyndyq jáne kásíbılígíníń aıqyn dálelí.
