Ońtústikkoreıalyq juldyzdar Almatyda Netflix úshin trevel-shoý túsirip jatyr, - dep habarlaıdy Aqshamnews.kz tilshisi.
Almaty jahandyq kreatıvti ındýstrıanyń jańa oshaǵyna aınalýda. 24-27 shilde aralyǵynda qala men onyń kórikti aýmaǵy tanymal ońtústikkoreıalyq Hit And Miss Tour 4 trevel-shoýynyń túsirilim alańy boldy. Joba Channel S telearnasynan kórsetilip, keıin Netflix platformasynda búkil álem kórermenine jol tartady.
Shoýdyń basty keıipkerleri – Ońtústik Koreıanyń tanymal komedıa sheberleri Kım De Hı, Kım Djýn Ho, Chan Don Mın, Iý Se Iýn jáne Hon In Gú. Realıtı formatyndaǵy bul joba ár elde jańa áser men kúlkige toly saıahatty kórsetedi. Qatysýshylar kún saıyn túrli oıyndar men tapsyrmalar oryndaıdy, al jeńilgender toptyń jol shyǵynyn óteıdi. Bul ereje ár lokasıany naǵyz shoý alańyna aınaldyrady.
Almatydaǵy túsirilim 28 gvardıashy-panfılovshylar saıabaǵy, Voznesensk kafedraldy shirkeýi, Kókbazar, Shymbulaq, Kóktóbe sıaqty qalanyń tanymal oryndarda ótti. Sondaı-aq, túsirý toby Almaty mańyndaǵy Sharyn shatqalyna, Kólsaı men Qaıyńdy kólderine de at basyn burdy.
Joba Almaty qalasy Týrızm basqarmasyna qarasty Almaty Tourism Bureau-nyń qoldaýymen, kreatıvti týrızmdi damytý aıasynda júzege asty. Bul baǵyttaǵy negizgi quraldardyń biri kıno jáne telejobalardy qalaǵa tartýǵa arnalǵan Location Scout qyzmeti. Búro tarapynan túsirilim toptaryna lokasıany irikteý men ruqsat alý sátinen bastap túsirilim barysyna deıingi jan-jaqty kómek kórsetildi.
– Almatynyń osyndaı halyqaralyq jobalarda kórinis tabýy jaı ǵana ádemi kórinis emes, bul qalanyń jáne eldiń týrısik áleýetin strategıalyq deńgeıde ilgeriletý. Sheteldik jobalardyń Almatyny tańdap jatqanyna qýanyshtymyz, – dedi Almaty Tourism Bureau basshysy Dıar Asqarov.
Hit And Miss Tour 4 baǵdarlamasynyń premerasy 23 jáne 30 tamyzda, sondaı-aq, 6 qyrkúıekte ótedi. Joba nátıjesinde Almatyǵa degen qyzyǵýshylyqtyń artyp, qalanyń halyqaralyq týrısik ımıji nyǵaıa túspek.
Aıta keteıik, Netflix platformasynyń álem boıynsha 300 mıllıonnan astam oqyrmany bar, al jalpy aýdıtorıasy 700 mıllıon adamnan asady.
2025 jyldyń alǵashqy toqsanynda Almatyǵa 145 myń sheteldik týrıs saıahattap kelgen. Bul ótken jylmen salystyrǵanda 18% artyq. Qalaǵa kóbine Úndistan, Qytaı men Túrkıadan, sonymen qatar AQSH, BAÁ, Ońtústik Koreıa, Ulybrıtanıa jáne Germanıadan kelgen saıahatshylar jıi at basyn burady.