Almatyda ótken «Túrkí álemíníń medıa keńístígí: jańa dáuírdegí míndetter men múmkíndíkter» taqyrybyna VI Halyqaralyq túrkítíldes jurnalıster medıa forumynda óńírlík qauípsízdík taqyrybyndaǵy jıynda medıa salasynyń mańyzy erekshe atap ótíldí. Germanıyadaǵy Túrík medıasy assotsıatsıyasynyń mamany Adnan Óztúrktíń aıtuynsha, medıa – tek aqparat taratatyn qūral emes, halyqtar arasyndaǵy sením men túsínístí qalyptastyratyn, keıde típtí shıelenístí kúsheıtuí de múmkín bolatyn yqpaldy kúsh.
Sarapshy píkírínshe, «medıa – júrekter arasyndaǵy kópír». Ol sońǵy jyldardaǵy oqıǵalardy mysalǵa keltíre otyryp, aqparat qūraldarynyń beıbítshílíkke qosatyn úlesín túsíndírdí.
Kavkaz tájírıbesí de osyny dáleldeıdí. 2020 jylǵy qaqtyǵys kezínde áleumettík jelílerde taraǵan jalǵan aqparat túrlí etnostar arasyndaǵy qorqynysh pen óshpendílíktí kúsheıtken. Alaıda onyń aıtuynsha, «keıbír medıa resurstary tekserílgen aqparat pen pragmatıkalyq kózqarasty ūsyna otyryp, jaǵdaıdy jūmsartuǵa kómektestí».
«Tayau Shyǵystaǵy dıalogtyq jobalar mysalǵa aluǵa bolady. Bír telearna jas buyndy ortaq studıyaǵa jınap, ashyq píkír almasu ūıymdastyrǵan. Jastar bír-bíríne qarsy tarap ókílderí retínde emes, ortaq aımaqtyń balalary retínde sóılestí. Būl mıllıondaǵan kórermenníń sanasyndaǵy kóptegen stereotıpterdí būzdy, – dedí Adnan Óztúrk.
Mamandardyń píkírínshe, medıa – aqparat taratushy ǵana emes, jauapkershílík ıesí. Habar tílíníń yńǵaıy, kadr tańdauy, taqyryp qoyudyń ózí qoǵamdaǵy ahualǵa tíkeleı áser etedí.
«Medıa qorqynyshty emes, empatıya men túsínístí kúsheıtuí kerek. Naǵyz qauípsízdík – ananyń kóz jasyn, balanyń qorqynyshyn, jastyń úmítín shynaıy kórsetu arqyly qalyptasady. Shynaıy jurnalıst – tek derek jazatyn adam emes, adamdy qorǵaushy. Al shynaıy medıa – qorqynystyń emes, adamzattyń jaǵynda tūratyn medıa», – deıdí sarapshy.
Aıta keteıík, medıa forumǵa Qazaqstan, Ortalyq Azıya, Túrkıya, Europa elderínen BAQ basshylary, jurnalıster, deputattar, medıa salasyndaǵy ÚEŪ basshylary, Qoǵam qaıratkerlerí, PR menedjerler, baspasóz hatshylary, jurnalıstıka fakultetíníń mūǵalímderí men studentterí t.b. qatysty.