Almatyda Almaty Resort aumaǵynda dástúrlí Picnic by Partners festıvalí óttí. Būl ís-shara — jyl saıynǵy qalalyq mádenı ís-sharalardyń resmı bastauy. 12 jyldyq tarıhy bar joba alǵashynda shaǵyn jergílíktí ís-shara retínde ūıymdastyrylsa, búgínde ol respublıkalyq auqymǵa ıe boldy: qazír festıval bes írí qalada - Almaty, Astana, Shymkent, Aqtau jáne Atyrauda ótkízílíp, myńdaǵan qatysushy men qonaqty bíríktíredí. Aqshamnews.kz tílshísí dám, sán men óner toǵysqan festıvalden arnaıy reportaj ūsynady.
Bıylǵy mausymda dál Almaty būl úlken mádenı sharany bírínshí bolyp qabyldap otyr. Uaqyt óte kele Picnic by Partners tek muzykalyq festıval emes, keń auqymdy qarym-qatynas, shyǵarmashylyq shabyt jáne kásíbı baılanys ornatu alańyna aınaldy.
Ár jyl saıyn myńdaǵan adam kelíp, zamanauı qalalyq qoǵamnyń bír bólígíne aınalady. Qonaqtardyń nazaryna sonymen qatar - erekshe gastronomıyalyq jobalar, zamanauı óner qondyrǵylary, ınteraktıv aımaqtar, jańa ónímder men qyzmetterdíń tūsaukeserlerí ūsynyldy.
Bıylǵy festıvaldíń basty erekshelígí - tájírıbe format. Ūıymdastyrushylar ís-sharanyń tūjyrymdamasyna jasandy ıntellekt tehnologıyasyn engízdí. Tsıfrlyq jańashyldyqtar baǵdarlamanyń mazmūnyn baıytuǵa, keńístíktí bezendíruge jáne qonaqtarmen ózara árekettesudíń jańa túrlerín qūruǵa kómektestí. Baǵdarlamanyń negízgí bólígí — áıgílí Esquire, ELLE jáne Harper’s BAZAAR basylymdarynyń ıdeyalary negízínde qūrylǵan píkírtalas alańdary men sūhbattar serıyasy boldy.
Ár aımaq óz taqyryby boıynsha jūmys ístep, qonaqtardy qyzyqtyrǵan taqyryptardy qozǵady. Festıvaldíń taǵy bír mańyzdy bólígí — Almaty qalasynyń Turızm basqarmasy qoldauymen ūıymdastyrylǵan sheberler alańy. Mūnda qazaqstandyq qolóner sheberlerí óz tuyndylaryn ūsyndy: ūlttyq naqyshtaǵy suvenırler, áshekeı būıymdar, úıge arnalǵan sándík zattar jáne sándík-qoldanbaly ónerdíń bíregeı úlgílerí.
Árbír būıymda halqymyzdyń ǵasyrlar boıy qalyptasqan dástúrí men zamanauı shyǵarmashylyq kózqaras úılesím tapqan. Būl keńístík qonaqtarǵa ūlttyq mádenı mūramyzdy tereńírek tanyp bíluge, sheberlermen tíkeleı sóılesuge, jáne olardy satyp aluǵa múmkíndík berdí.
«Almaty qalasynyń Turızm basqarmasy osyndaı ís-sharalardy únemí qoldaıdy. Qazírgí tańda Picnic by Partners sıyaqty qala tūrǵyndaryn bíríktíretín festıvalderge qoldau kórsetíp kelemíz. Qolónershíler óz jūmystaryn ūsynyp, keń audıtorıyaǵa tanystyru múmkíndígíne ıe boldy. Turıster úshín būl - qazaq dástúrín jaqynnan kóríp, tanyp-bíluge úlken múmkíndík. Osyndaı sharalar Almatynyń turıstík tartymdylyǵyn arttyryp, qalanyń jyly árí ashyq atmosferasyn aıqyn kórsetedí»,-dedí ol Almaty qalasy Turızm basqarmasynyń kreatıvtí damu bólímí bas mamany Alsu Marat.
Bıylǵy jūldyzdy qonaqtar qatarynda qytaılyq aktrısa, ánshí Yan Ge, álemge tanymal ázílkesh Tambı Masaev, dızaıner Gosha Kartsev pen ánshí-dıdjeı Tom Bokser boldy.
Típtí Tambı Masaev qazaqtyń dástúríne tán shashu shashyp úlgerdí.
Picnic by Partners ūsynǵan qyzyq ınteraktıv
Picnic festıvalíníń eń erekshe dástúrleríníń bírí — qonaqtar arasynda ekí adamǵa arnalǵan eksklyuzıvtí sayahat ūtysyn ótkízu.
Bıyl Almatydaǵy Picnic qonaqtaryna Air Astana qoldauymen Dubaıǵa joldama ūtyp alu múmkíndígí beríldí. Ol úshín qatysushylar festıval aumaǵyndaǵy 9 arnaıy punktke baryp, seríktester daıyndaǵan oıyndarǵa qatysyp, óz «tólqūjatyna» mór jınauy kerek edí.
Kesh ayaǵynda barlyq kezeńnen ótken qatysushylar arasynda ūtys oınatylyp, Dubaıǵa ekí adamǵa arnalǵan joldamanyń baqytty ıesí anyqtaldy. Osylaısha Picnic bıyl da qonaqtaryna tek muzyka men kóńíl kúı emes, ūmytylmas áser men erekshe múmkíndík syılady.