«Ózíníń uaqytyn ayamaı, ózgeníń baqytyn ayalap» júrgen mūǵalím degen mamandyqtyń ıelerí bír kezde kez kelgen kontsert zalyn toltyrushy, kóshe tazalaushy bolyp túrlí qoǵamdyq jūmysqa jegílíp, aılyǵy shaılyǵyna jetpeı ómír súrdí. Sońǵy uaqytta mūǵalímníń mártebesí kóterílíp, jalaqysy da molaıyp, jaǵdaıyna memleket tarapynan kóńíl bólíndí. Aldaǵy 2026 jyly mūǵalímderdí ne jańalyq kútíp tūrǵany jaıly Aqshamnews.kz tílshsí tarqatady.
Mūǵalímderden qandaı míndetter alynyp tastalady?
Qaǵazbastylyqty azaıtu – qaǵaz nemese elektron qūjattyń bíreuín ǵana toltyru, júıege 1 ret engízu jetkílíktí: Kundelık nemese NOBD jáne Bılımland-tíń bíreuíne engízílgen derek bírneshe júıede qaıtalanbauy kerek.
Blog júrgízuge míndettemeu – áleumettík jelíní tek óz qalauymen júrgízedí, mūǵalímdí post jazuǵa nemese blog júrgízuge májbúrleuge bolmaıdy. Chattar men habarlamalar tek resmı júıeler men poshta arqyly jazylady.
Jauapkershílíktí azaıtu – mektepten tys jaǵdaıǵa mūǵalím jauap bermeıdí. Zańdar men eńbek kelísímshartynda kórsetílmegen jūmystyń báríne mūǵalím míndettí emes.
Ata-anamen kelísím kúsheıedí, bar auyrtpalyq mūǵalímge ǵana artylmauy kerek. Mektep pen ata-ana ózara kelísímdí qatań ūstanuǵa míndettí.
Mártebesín qorǵau – endí mūǵalím mártebesín būzǵandarǵa aıyppūl kólemí kóbeıedí.
«Amanat» partıyasynyń tóraǵasy Erlan Qoshanov: «Mūǵalímníń míndetí – oqytu, báríne kínálí bolu emes. Mūǵalím óz míndetíne kírmeıtín nárseler úshín jauap bermeuí kerek. Onyń basty mıssıyasy – oqytu, artyq funktsıyalarmen aınalysu emes. Sondyqtan bízdíń fraktsıya deputattary pedagogtardy shamadan tys talaptardan qorǵau jáne jauapty ata-analyq mádenıettí nyǵaıtu úshín zańnamaǵa túzetuler engízuge daıyndyq júrgízíp jatyr», dedí.
Būl turaly basqadan górí osy mamandyqtyń ıesíníń píkírí qūndy. Aıtylǵan máseleníń barlyǵyn kózímen kóríp, kúndelíktí osy jūmysty atqaryp júrgen mūǵalímderdíń oıyn bílmekke sózge tarttyq.
Qaǵazbastylyq azaıdy degen aty ǵana...
Shymkent qalasyndaǵy H.Dosmūhamedov atyndaǵy №4 jalpy orta bílím beretín mektebíníń tarıh pání mūǵalímí Aıdana Batyrhan bylaı dedí:
Jalpy, «Pedagog mártebesí turaly» zań qabyldanǵaly berí mūǵalímníń artyq míndetterí edáuír qysqardy. Soǵan qaramastan, ókíníshke qaraı, keıbír mektep dırektorlary mūǵalímderdí álí kúnge deıín ár apta saıyn senbílíkke shaqyryp, zań talaptaryn tolyq oryndamaı keledí. Mūǵalím óz qūqyǵyn zańmen qorǵamasa, osyndaı ūsaq talaptarǵa kónuge májbúr bolyp júr.
Qaǵazbastylyq azaıdy degenmen, būl kóbíne aty ǵana sıyaqty. Jyl saıyn ózgeretín būıryqtar, naqtylyǵy joq sabaq josparlary, tausylmaıtyn qūjattar… Bárí mūǵalímníń negízgí jūmysyna, yaǵnı sapaly sabaq beruíne kedergísín tıgízedí. Al Kundelik-ten Bilimclass-qa jıí auystyru da mūǵalímderge qosymsha júkteme bolyp otyr.
«Maqsatty mekteptíń» toqtaǵany úshín alǵys aıtqym keledí
Iá, mūǵalímderdí blog júrgízuge eshkím májbúrleı almaıdy. Degenmen, sońǵy jyldary chattar arqyly – senbí, jeksenbí kúnderí de – saualnamalardyń jıí keluí mūǵalímderdíń jūmysyn qıyndatyp jíbergení ras. Ásírese «Maqsatty mektep» jobasy ayasynda túrlí saualnamalar mūǵalímderdíń uaqytyn alyp, tíkeleı oqu protsesíne kedergí keltírdí.
Oqu-aǵartu mınıstrí Jūldyz Súleımenova būl jobany toqtatu turaly sheshím qabyldady. Osy rette mınıstrge mūǵalímderdíń máselesín der kezínde eskeríp, naqty qadam jasaǵany úshín alǵys aıtqym keledí.
Būl ózgerísterdíń barlyǵy – qūptaıtyn jaǵdaı. Mūǵalímníń mektepten tys oqıǵaǵa jauap bermeuí, zańda kórsetílmegen jūmysty oryndauǵa míndettí emestígí, ata-anamen kelísímníń kúsheyuí – bárí mūǵalímge túsetín qajetsíz júktemení azaıtady. Sondaı-aq pedagog mártebesín būzǵandarǵa aıyppūldyń ósuí mūǵalímníń qūqyǵyn qorǵaudy kúsheıtíp otyr.
Al Almaty qalasynyń mūǵalímí Baıǵazıeva Alıyanyń būl jóníndegí píkírí mynadaı:
Mūǵalímderdíń jūmysyn jeńíldetu úshín artyq míndetterdí alyp tastau – dūrys árí uaqyt talabyna saı sheshím. Qaǵazbastylyqty azaıtu, qūjatty bír ret qana engízu jáne onyń bírneshe júıede avtomatty túrde kórínuí – mūǵalímníń negízgí jūmysy bolyp tabylatyn sabaqqa daıyndaluǵa, oqushymen jūmys ísteuge kóbírek uaqyt bóluíne múmkíndík beredí. Kundelík, NOBD nemese Bılımland júıeleríníń bíreuíne ǵana málímet engízíp, onyń basqa platformalarda qaıtalanbauy – bílím beru protsesín ońtaılandyryp, mūǵalímderdíń ákímshílík júktemesín aıtarlyqtaı azaıtady. Būl ózgeríster mūǵalímderdíń kásíbı tıímdílígín arttyrady jáne bílím sapasyna oń áser etedí.
Blog júrgízu jeke tūlǵa retínde ár adamnyń óz erkímen boluy kerek, oǵan míndetteu dūrys emes. Ata anamen jauapkershílíktí zańda naqtylap kórsetíp qoldanatyn sharalardy qatańdatpaıynsha jalǵyz mekteptíń shamasy kelmeıdí. Sańyrauqūlaqtaı qaptap ketken jekemenshík mektepter barda oqushylardy mektep qatal tártíppen ūstaı almaıdy.
