«Vırtýaldy ınformatıka muǵalimi» jobasy iske asyrylmaq
Ulttyq jobalar aıasynda 50 óńirlik oqý ornynyń IT-fakýltetteri beıindi IT-ýnıversıtetterge nemese qalyptasyp úlgergen IT-kompanıalardyń qamqorlyǵyna beriledi. Bul týraly QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın aıtyp berdi, dep habarlaıdy Almaty-akshamy.kz QazAqparat saıtyna silteme jasap.
«Bárimiz jaqsy túsinip otyrmyz, qazir IT salasy úshin JOO-lar daıarlaıtyn mamandardyń deńgeıi asa joǵary emes – ıaǵnı JOO-lar sapasy tómen mamandardy berip otyr. Bul da bizdiń ortaq problemamyz. Sondyqtan biz Bilim jáne ǵylym mınıstrligimen birlesip, 50 óńirlik JOO-nyń IT-fakýltetterin beıindi IT-ýnıversıtetterge nemese qalyptasyp úlgergen IT-kompanıalardyń qamqorlyǵyna berý jumystaryn júrgizetin bolamyz», - dedi mınıstr Ortalyq komýnıkasıalar qyzmetinde ótken baspasóz máslıhatynda.
Sonymen birge mınıstr IT startapshylar úshin «retteýshi ortanyń» bolýy mańyzdy ekenin jetkizdi.
«Mysaly, startapshy pıssany dronmen jetkizgisi kelse, bul úshin elimizde zańnama bazasy joq. Nemese bireý avtonomdy kólikti esh júrgizýshisiz synap kórgisi keledi. Oǵan da Qazaqstanda zańnama negizi joq. Mundaı tehnologıalardy synaqtan ótkizý úshin belgili bir aýmaqta «retteýshi orta» qurý qajet. Sol aýmaqta mundaı jańa tehnologıalardy qoldanýǵa bolady jáne startaptar óz jańalyqtarymen jumys isteı alady», - dep túsindirdi B. Mýsın.
Aıta keteıik, Memleket basshysynyń Joldaýy aıasynda «Sıfrlandyrý, ǵylam jáne ınovasıalar esebinen tehnologıalyq serpilis» ulttyq jobasy ázirlenip, bekitildi. Ulttyq joba 10 baǵyttan, 226 tapsyrmadan, 44 kórsetkishten jáne 211 is-sharadan turady, olardy iske asyrý 2025 jylǵa deıin josparlanǵan. Ulttyq joba aıasynda halyqqa qyzmet kórsetý ortalyqtary da sıfrlyq jáne beıneqyzmetterin iske qosady. Qazaqstannyń barlyq balalary ınformatıka jáne baǵdarlamalaý boıynsha sapaly bilim alýy úshin «Vırtýaldy ınformatıka muǵalimi» jobasy iske asyrylmaq.
Sonymen birge, ulttyq jobalar aıasynda halyqqa IT daǵdylaryn tegin úıretetin 20 ınovasıalyq mektep ashylady.