Qazaqstan mūsylmandary dínı basqarmasynyń 35 jyldyq mereıtoıyna oraı múftıyat ortalyq apparat qyzmetkerlerí men oblystardyń Bas ımamdarynan qūralǵan komandalar arasynda futboldan turnır ūıymdastyryldy, - dep habarlaıdy Aqshamnews.kz.
Múftıyattyń habarlauynsha, sporttyq shara dínı qyzmetkerler arasynda salauatty ómír saltyn nasıhattauǵa jáne ózara yntymaqtastyqty arttyruǵa baǵyttaldy.
Turnırge barlyǵy 6 komanda qatysyp, tartysty kezdesuler ótkízdí. Íríkteu kezeńderínde úzdík nátıje kórsetken komandalar fınaldyq kezeńge joldama alyp, júldelí oryndar úshín ózara baq synasty.
Jarys qorytyndysy boıynsha bírínshí oryndy «Esíl» komandasy, ekínshí oryndy «Tarbaǵataı» komandasy, al úshínshí oryndy «Jaıyq» komandasy ıelendí.
Sonymen qatar turnır barysynda erekshe kózge túsken oıynshylar jekeleı nomınatsıyalar boıynsha marapattaldy. Atap aıtqanda, «Úzdík oıynshy» atalymy Mahambet Eskendír men Elbek Tasbolatūlyna būıyrdy. «Úzdík shabuylshy» nomınatsıyasymen Estaı Ábdíǵalı men Nūrsūltan Espolov marapattaldy. «Úzdík qaqpashy» retínde Nūrbolat Sydyqov, al «Úzdík qorǵaushy» atalymymen Aǵabek Sydyqov tanyldy.
