Qazaqstannyń eńbek síńírgen qaıratkerí Nūrlan Segízbaev dúnıeden óttí. Ol Abdolla Qarsaqbaevtyń áıgílí «Meníń atym Qoja» kórkem fılmíndegí basty rólí arqyly kórermenge keńínen tanyldy. Qazaqstan Respublıkasy Mádenıet jáne aqparat mınıstrlígí marqūmnyń otbasy men jaqyndaryna, sondaı-aq Qazaqstan halqyna kóńíl aıtty.
«Nūrlan Sanjarūly – qazaq mádenıetí men óneríníń damuyna eleulí úles qosqan tūlǵa. Ol óz ǵūmyryn shyǵarmashylyqqa, ūlttyq ruhanıyatqa arnap, keıíngí ūrpaqqa ónege bolatyn mol mūra qaldyrdy. Ónersúıer jūrtshylyqqa álí kúnge qūndylyǵyn joımaı kele jatqan Abdolla Qarsaqbaevtyń «Meníń atym Qoja» fılmíndegí basty rólímen tanymal óner ıesí qazaq kıno óneríndegí dara tūlǵa boldy. Onyń ekranda jasaǵan kórkem beınelerí otandyq óner tarıhynda aıryqsha oryn alady. Nūrlan Sanjarūlynyń jarqyn beınesí, shyǵarmashylyq mūrasy men ǵıbratty ǵūmyr joly halqymyzdyń jadynda máńgí saqtalady dep senemíz. Marqūmnyń jany jánnatta, ımany salamat, topyraǵy torqa bolǵaı», - delíngen habarlamada.
Sońǵy jyldary Nūrlan Sanjarūly auyr dertpen kúresken. Dárígerler oǵan ókpeníń sozylmaly obstruktıvtí auruynyń (HOBL) 4-dárejesí dıagnozyn qoıǵan.
Qazaqstannyń eńbek síńírgen qaıratkerí, akter, kınoger Nūrlan Sanjardyń janazanasy men qoshtasu 28-jeltoqsan (jeksenbí) Jazushylar odaǵynyń ǵımaratynda saǵ. 10-da ótedí.