Aqordada ótken kezdesude Prezıdent Qasym-Jomart Toqaev NVIDIA basshysy saparynyń ekíjaqty yntymaqtastyqty nyǵaıtudaǵy mańyzyn atap ótíp, onyń otandyq jasandy ıntellekt ekojúıesín damytuǵa qosqan úlesíne rızashylyq bíldírdí.
– NVIDIA kompanıyasymen yqpaldastyqqa sony serpín beru tūrǵysynan saparyńyzdyń mání zor. Seríktestígímízdí nyǵaıtu jolyndaǵy jáne Qazaqstannyń ıgílígí úshín atqaryp jatqan eńbegíńízge alǵys aıtqym keledí, – dedí Memleket basshysy.
Qasym-Jomart Toqaev tsıfrlandyru men jasandy ıntellektíní damytudy ūlttyq basymdyq retínde atady, sondaı-aq bıyl elímízde Tsıfrlandyru jáne jasandy ıntellekt jyly jarıyalanǵanyn eske saldy.
Memleket basshysy NVIDIA men Higgsfield kompanıyalary arasyndaǵy áríptestíktí quattaıdy. Onyń aıtuynsha, halqymyz atalǵan kompanıyanyń otandyq tehnologıyalyq jobalarǵa atsalysqanyn qūp kóredí.
NVIDIA jetekshísí Prezıdenttíń jańa ónerkásíptík revolyutsıyanyń bastapqy kezeńínde Qazaqstandy jasandy ıntellekt elí retínde órkendetu jóníndegí strategıyalyq maqsatyn joǵary baǵalady. Būl bastama jasandy ıntellektíní damytuǵa jáne ony keńínen engízuge baǵyttalǵan. Būdan bólek, kompanıya basshysy Qazaqstandy Physical AI álemdík habyna aınaldyrudy ūsyndy.
– Jasandy ıntellektíní damytu úshín, eń aldymen, mol quat kózí, sondaı-aq ǵylym, matematıka men tehnologıya salalarynda bílím-bílígí joǵary mamandar kerek. Osy baǵyttardyń árqaısysyn damytuǵa Qazaqstannyń áleuetí jetkílíktí, – dedí Djensen Huang.
Sondaı-aq ol NVIDIA kompanıyasynyń elímízben yqpaldastyǵy ayasynda keıíngí jyldary eleulí tabysqa qol jetkízílgeníne, tehnologıyalyq kompanıyalarmen baılanystar nyǵaya túskeníne nazar audardy.
– Sońǵy jyly ózara qarym-qatynasymyz óte nátıjelí boldy. Bíz qazaqstandyq, sonyń íshínde Firebird AI KZ Ltd jáne «Qazaqtelekom» kompanıyalarymen seríktestík baılanystardy damyta bastadyq. Sonymen bírge Qazaqstannyń alǵashqy tehnologıyalyq syńarmúıízí sanalatyn Higgsfield kompanıyasyna qoldau kórsetemíz. Būl joba jahandyq tehnologıyalyq ekojúıede oıyp tūryp oryn aldy. Bírge atqarǵan jūmystarymyzǵa dán rızamyn. Būl bíz eńseretín joldyń basy ǵana. Elíńízdíń kompanıyamyzben yntymaqtastyq ornatqanyna quanamyn, – dedí kompanıya jetekshísí.
Memleket basshysy Qazaqstanda jasandy ıntellektíníń damuyna úles qosqany úshín Djensen Huangty Í dárejelí «Dostyq» ordenímen marapattady.
