Qasym-Jomart Toqaev Palestına Memleketíníń Joǵary sudyasy, Prezıdenttíń dín ísterí jóníndegí keńesshísí Mahmūd ál-Habbashty qabyldady.
Memleket basshysy meımanǵa íltıpat bíldíre otyryp, dıplomatıyalyq qatynas ornaǵan sátten berí Qazaqstan men Palestına arasyndaǵy yntymaqtastyq dostyq, ózara qoldau jáne qūrmet sıpatynda damyp kele jatqanyna nazar audardy, - dep habarlaıdy Aqshamnews.kz.
Prezıdenttíń aıtuynsha, Qazaqstan Palestınany halyqaralyq qauymdastyqtyń tolyq múshesí retínde tanuǵa baǵyttalǵan bastamalardy dáıektí túrde qoldap keledí.
Būl rette Qasym-Jomart Toqaev elímízdíń Tayau Shyǵystaǵy ahualdy dıplomatıyalyq jolmen retteu, BŪŪ Jarǵysy men halyqaralyq qūqyq normalaryna sáıkes «Qos halyq úshín ekí memleket» formulasy negízínde Palestına memleketín qūru ūstanymyn jaqtaıtynyn málímdedí.
Mahmūd ál-Habbash Memleket basshysyna Palestına Prezıdentí Mahmūd Abbas joldaǵan hatty tabystady. Sondaı-aq elímízdíń Palestına halqyna jáne onyń beıbít árí jarqyn keleshekke ūmtylysyna ūdaıy qoldau kórsetkení úshín rızashylyǵyn jetkízdí.
Onyń píkírínshe, Qazaqstan Palestına úshín bauyrlas memleket sanalady. Būl ekíjaqty baılanystardan, kópjaqty formattaǵy, eń aldymen, BŪŪ men Islam yntymaqtastyǵy ūıymy ayasyndaǵy qatynastardan kórínedí.
Kezdesu sońynda Qasym-Jomart Toqaev Prezıdent Mahmūd Abbasqa ízgí sálemín joldap, ony aldaǵy uaqytta Qazaqstanǵa resmı saparmen keluge shaqyrdy.